تاجیکستان: چهار «تروریست» در مرز افغانستان کشته شدند

مقامات تاجیکستان روز یکشنبه گفتند چهار «تروریست» که از کشور همسایه افغانستان وارد خاک این کشور شده بودند، از بین برده شدند. این خبر توسط رسانه‌های دولتی تاجیکستان گزارش داده شده است.

تاجیکستان در آسیای مرکزی، مرز کوهستانی با افغانستان دارد و از زمان تصرف دوباره قدرت توسط طالبان در سال ۲۰۲۱، با اداره این گروه روابط پرتنش داشته است.

مطالب ویدیویی را در صفحه یوتیوب ما ببینید!

براساس معلومات سازمان‌های امنیتی تاجیکستان که از سوی خبرگزاری دولتی «خاور» نقل شده است، چهار تروریست پس از آن که از تسلیم شدن خودداری کردند، در منطقه جنوبی «ختلون» کشته شدند.

بیشتر بخوانید: طالبان: مشترکاً با تاجیکستان در باره درگیری مرزی مرگبار تحقیق می‌کنیم

مقام‌های تاجیکستان از ماه نوامبر سال گذشته تاکنون حداقل پنج رویداد مرگبار در این منطقه مرزی کوهستانی که حدود ۱۳۵۰ کیلومتر (۸۴۰ مایل) طول دارد، گزارش کرده‌اند.

براساس معلومات خبرگزاری فرانسه تاکنون در مجموع ۱۶ نفر در چنین رویدادها کشته شده‌اند. این افراد شامل نیروهای مرزبانی تاجیکستان، کارگران چینی و افرادی هستند که تاجیکستان آنها را «قاچاقچی» و «تروریست» می‌نامد.

پس از حمله به اتباع چینی در ماه نوامبر سال گذشته، مقامات تاجیکستان از طالبان خواستند که اقدامات لازم را برای جلوگیری از بی‌ثباتی در این منطقه مرزی ناامن که گروه‌های قاچاق مواد مخدر و اسلام گرا در آن فعال هستند، انجام دهند.

برخلاف دیگر رهبران آسیای مرکزی که روابط خود با طالبان را تقویت کرده اند، امامعلی رحمان رئیس‌جمهور تاجیکستان که از سال ۱۹۹۲ قدرت را در دست دارد، آشکارا از اداره طالبان در افغانستان انتقاد می‌کند.

بیشتر بخوانید: کشته شدن اتباع چینی؛ گفتگوی وزیران خارجه طالبان و تاجیکستان

او از طالبان خواسته است که حقوق اقلیت تاجیک در افغانستان که تقریباً یک چهارم جمعیت کشور را تشکیل می‌دهند، رعایت کنند.

صفحه اینستاگرام دویچه وله دری را دنبال کنید

با این حال، تاجیکستان نیز اقداماتی برای همکاری با کابل انجام می‌دهد، از جمله تامین برق، بازگشایی بازارهای مرزی و بعضاً دیدارهایی بین مقام‌های محلی تاجکستان و طالبان انجام می‌شود.