የአፋር ወጣቶች ቅሪታ

የኢትዮጵያ  ጠቅላይ ሚኒስትር አቶ አብይ አህመድ ዛሬ በአፋር ክልል በሰመራ ከተማ ከተለያዩ የህብረተሰብ ክፍሎች ጋር በልዩ ልዩ ጉዳዮች ላይ ተወያይተዋል። በውይይቱ ላይ ከህብረተሰቡ ለተነሱ ልዩ ልዩ ጥያቄዎች ጠቅላይ ሚኒስትሩ መልስ ሰጥተዋል። በውይይቱ ያልተጋበዙ ፣ግን ከጠቅላይ ሚኒስትሩ ጋር መወያየት እንፈልጋለን ሲሉ ውይይቱ ወደሚካሄድበት አዳራሽ ለመግባት የጠየቁ ወጣቶች በፖሊስ እንደተደበደቡ እና እንደታሰሩ በአካባቢው ነበርን ያሉ የከተማዋ ነዋሪዎች ለዶቼቬለ ተናግረዋል።

በውይይቱ ላይ  እንደተገኙ የነገሩን አንድ የአፋር ተወላጅ እንዳሉት ህብረተሰቡ ለጠቅላይ ሚኒስትሩ ካነሳቸው ጥያቄዎች መካከል በልማት ሰበብ የተፈናቀሉ ሰዎች ጉዳይ እና የአዋሽ ወንዝ ብክለት ያስከተለው የጤና ችግር ይገኙበታል።

የትኛውንም ወረዳ እንደማይወክሉ የተናገሩት እኚሁ ነዋሪ  ጠቅላይ ሚኒስትሩ ለህብረተሰቡ ጥያቄዎች የሰጡት መልስ ከሞላ ጎደል ጥሩ ነው ብለዋል። ሆኖም ጥያቄ የማቅረብ እድል አለማግኘታቸውን ተናግረው በአንዳንድ ጉዳዮች ላይ  አጥጋቢ መልሶች እንዳላገኙ መነሳት ነበረባቸው ያሏቸው ጥያቄዎችም እንዳልተነሱ ተናግረዋል።  

ወደ ውይይቱ አዳራሽ መግባት ተከለከልኩ የሚል ሌላው ወጣት ደግሞ የአፋር ወጣቶች ጠቅላይ ሚኒስትሩ በተገኙበት ውይይት ላይ ለመካፈል ቢፈልጉም አለመጋበዛቸውን ይገልጻል።

ውይይቱ ወደ ሚካሄድበት ስፍራ ሄደው ለመግባት የጠየቁ ወጣቶችም እርሱ እንደሚለው በልዩ ፖሊስ ተደብድበው ጉዳት ደርሶባቸዋል የታሰሩም አሉ።

ከተጎዱት መካከል ሴቶች እና በእድሜ የገፉም እንደሚገኙበት ወጣቱ ተናግሯል። በርሱ አባባል ወጣቶቹ ስብሰባው እንዳይገቡ የተከለከሉት በክልሉ ያለውን ችግር ያጋልጣሉ በሚል ስጋት ሳይሆን አይቀርም።  ዶቼቬለ ጉዳዩ የሚመለከታቸውን የክልሉን ባለሥልጣናት ለማነጋገር ያደረገው ሙከራ አልተሳካም።

ኂሩት መለሰ

ሸዋዬ ለገሠ