የአንጋፋው ጋዜጠኛ ጌታቸው ደስታ ሥርዓተ ቀብር ተፈጸመ

ከ1960 ዎቹ ጀምሮ ለረጅም ዓመታት በኢትዮጵያ ሬድዮና ቴሌቪዥን፣ በኋላም በጀርመን ዓለም አቀፍ የመገናኛ ብዙኃን ዶይቼ ቬለ የአማርኛው አገልግሎት ያገለገለው አንጋፋው ጋዜጠኛ ጌታቸው ደስታ ሥርዓተ ቀብር ዛሬ በመንበረ ፀባዖት ቅድስት ሥላሴ ካቴድራል ተፈፀመ። አንጋፋው ጋዜጠኛ ጌታቸው ደስታ ከጋዜጠኝነት ሞያው ባሻገር በተለያዩ በጎ ሥራዎች ላይም ተሳታፊ ነበር። በተወለደ በ86 ዓመቱ ለህክምና በቆየበት ጀርመን ሀገር ከዚህ ዓለም የተለየው ጋዜጠኛ ጌታቸው አስክሬኑ ወደ ሀገሩ የተመለሰው ትናንት ጥዋት ነበር። የሁለት ልጆችና እንደ ልጆቹ አድርጎ ያሳደጋቸው አምስት ልጆች አባት የነበረው ጋዜጠኛ ጌታቸው ደስታ በኢትዮጵያ ሬድዮ የአድማጮች የሙዚቃ ምርጫንና በቴሌቪዥን የሕብረት ትርዒትን በመምራት ተወዳጅነትን ያተረፈ እንደነበር በሕይወት ታሪኩ ላይ ተገልጿል።
ሰሎሞን ሙጬ
ማንተጋፍቶት ስለሺ
ሸዋዬ ለገሠ