ጀርመን የሚኖሩ ኢትዮጵያውያን ወቀሳ

ጀርመን የሚኖሩ ኢትዮጵያውያን  በፍራንክፈርት እና በበርሊን እንዲሁም በሌሎች የአውሮጳ ከተሞች  በዚህ ሳምንት መጨረሻ ሊያደርጉ ያቀዱትን ውይይት ፣እንደሚያውኩ «የተደራጁ ኃይሎች» ካሏቸው ኢትዮጵያውያን  ዛቻ እና ማስፈራሪያ እንደደረሳቸው አስታወቁ። የመድረኩ አዘጋጆች ነን የሚሉት ለዶቼ ቬለ DW፣ እንደተናገሩት እነዚሁ «የኢትዮጵያ ጠቅላይ ሚኒስትር ዐብይ አህመድ» ደጋፊ ነን የሚሉ ኃይሎች የአዲስ አበባ ባለአደራ ምክር ቤት የተባለው ስብስብ ምክትል ሊቀመንበር አቶ ኤርሚያስ ለገሠ የሚገኙባቸውን እነዚህኑ መድረኮች እንደሚረብሹ ለአዘጋጆቹ በተለያየ መንገድ ማስጠንቀቂያዎች ልከውላቸዋል። በጀርመን የኢትዮጵያ ኤምባሲ ሠራተኞች ሲሉ የገለጹዋቸውም በማኅበራዊ መገናኛ ዘዴዎች «የባልደራስ አባላት መድረክ ሊሰጣቸው አይገባም የሚል መልዕክት አስተላልፈዋል»ሲሉም ወቅሰዋል።

አዘጋጆቹ በስም የጠቀሷቸውን የኤምባሲውን ባልደረባ ለማነጋገር በተደጋጋሚ ብንደውልም ልናገኛቸው አልቻልንም። የባልደራስ የአውሮጳ መድረክ አስተባባሪዎች  ለቅዳሜ ሐምሌ 20፣2011 ዓም በፍራንክፈርት፣ በማግሥቱ ለእሁድ ሐምሌ 21፣2011 ዓም በበርሊን ስብሰባ ለማድረግ ነው ጥሪ ያስተላለፉት።አቶ ሱራፌል አስፋው ከባልደራስ የአውሮጳ መድረክ አስተባባሪዎች አንዱ መሆናቸውን ተናግረዋል። ስማቸው እንዲጠቀስ ያልፈለጉ የበርሊኑ መድረክ አስተባባሪ ነኝ ያሉ ግለሰብ ለዶቼቬለ እንደተናገሩት የባልደራስን አቋም ይቃወማሉ የተባሉት እነዚሁ ኢትዮጵያውያን ስብሰባው ሊካሄድበት የነበረው አንድ ምግብ ቤት ድረስ በመሄድ ዝግጅቱ በዚያ እንዳይደረግ ባለቤቶቹን አስጠንቅቀዋቸዋል።የምግብ ቤቱን ባለቤት ስለ ጉዳዩ ለማነጋገር በተደጋጋሚ ስልክ ብንደውልም መልስ አልሰጡንም።የበርሊኑ መድረክ አዘጋጆች ስብሰባውን በሌላ ቦታ እንደሚያካሂዱ እና የፖሊስ ጥበቃም እንደሚጠይቁ ገልጸዋል። የፍራንክፈርቱ ስብሰባ አዘጋጆች በበኩላቸው ጉዳዩን ወደ ሕግ እንደሚወስዱት እና ለቅዳሜው ስብሰባቸው ጥበቃ እንዲደረግላቸው ለፖሊስ እንደሚያሳውቁ ተናግረዋል።

በአስተባባሪዎቹ በስም ከተጠቀሱት አንዱ በጀርመን የኢትዮጵያ ኤምባሲ ባልደረባን በኤምባሲው ማዞሪያ፣ በቀጥታ ስልካቸው እና በእጅ ስልካቸው ላይ ተደጋጋሚ ጥሪ ብናደርግም ስልኮቹ ባለመነሳታቸው ልናገኛቸው አልቻልንም። ለበርካታ ዓመታት በጀርመን የኢትዮጵያ ሰብዓዊ መብት ኮሚቴ ሰብሳቢነት የሰሩት አቶ ስዩም ሃብተ ማርያም የበርሊኑን እና የፍራንክፈርቱን ስብሰባዎች ለማደናቀፍ ተደረጉ የተባሉትን ሙከራዎች  ሕገ ወጥ እና በጀርመን ሕግም የሚያስጠይቁ ብለዋቸዋል።ዓላማችን በሰላማዊ መንገድ ሃሳብ መለዋወጥ ነው የሚሉት የቅዳሜ እና የእሁዱ የፍራንክፈርት እና የበርሊኑ መድረክ አዘጋጆች፣ ተቃዋሚዎች ከዛቻ እና ማስፈራራት ይልቅ በመድረኩ ተገኝተው ቢሞግቱ መልካም ይሆን ነበር ብለዋል።

ኂሩት መለሰ

ተስፋለም ወልደየስ