የባልደራስ አመራሮች የክስ ሂደት

የባልደራስ ለእውነተኛ ዴሞክራሲ አመራሮችን የክስ ሂደት የተመለከተው የፌዴራል ከፍተኛ ፍርድ ቤት ልደታ ምድብ አንደኛ የፀረ ሽብር እና ሕገ መንግሥታዊ ጉዳዮች ችሎት ለዛሬ ይዞት የነበረውን ምስክሮችን የማድመጥ ሂደት ለነገ በማድረግ ተጠናቋል።  ችሎቱ ዐቃቤ ሕግ ነገ ምስክሮችን ይዞ እንዲቀርብ አዟል። ዐቃቤ ሕግ በዛሬው ችሎቱ ሁለት ምስክሮች ቃላቸውን እንደሚሰጡ ለፍርድ ቤቱ ተናግሮ ነበር።

ሆኖም የተከሳሽ ጠበቆች በዛሬው ችሎት አራት ምስክሮች መቅረብ እንደነበረባቸው እና የምስክሮች ስም ዝርዝር ለተከሳሾች እና ጠበቆች መድረስ ሲገባው እንዳልደረሳቸው በመግለፅ ተከራክረዋል።

ዐቃቤ ሕግ በበኩሉ የምስክሮች ዝርዝር ለተከሳሾች እና ጠበቆች እንዲደርስ ፍርድ ቤት ትዕዛዝ አለመስጠቱን በመጥቀስ ተከራክሯል። ግራ ቀኙን ክርክር ያደመጠው ችሎቱ ዐቃቤ ሕግ ነገ ምስክሮቹንና የምስክሮቹን ዝርዝር ይዞ እንዲቀርብ አዟል። በአዲስ የተሰየሙት ዳኞች የጉዳዩን ዝርዝር ዶሴ ገና አለማንበባቸውን ጠቅሰው ከተከሳሾች ሁለት የመብት ጥያቄዎችን አድምጠው ችሎቱ ነገ ረፋድ እንዲቀጥል ትዕዛዝ አስተላልፈዋል።

ሰለሞን ሙጬ

አዜብ ታደሰ

ኂሩት መለሰ