«የእስረኞች መፈታትና ክስ መቋረጥ ለዕርቅ፣ ለመግባባትና ሰላምን ለማምጣት ጥሩ ርምጃ ነው።»

 መንግሥት የአገር አንድነትን ለማጠናከር፣ እንዲሁም የዴሞክራሲ ሥርዓቱን ለማስፋት ሲባል ባለፉት ወራት ፣ በተለይ ዶክተር አብይ አህመድ አዲስ ጠቅላይ ሚንስትር ሆነው ከተሰየሙ ጀምሮ በወሰደው ርምጃ ብዙ የፖለቲካ እስረኞች፣ ጋዜጠኖች እና በሙስና ወንጀል ተጠርጥረው የታሰሩ ተለቀዋል። ሰሞኑን ከተለቀቁት 576 መካከል 137ቱ በሽብርተኝነት፣ 31ዱ ደግሞ በሙስና ክስ የታሰሩ ናቸው።

ከነዚህም መካከል በሽብረትኝነት ወንጀል ታስረው የነበሩት የቀድሞዉ የግንቦት 7 የፍትሕ፤የነፃነት እና የዴሞክራሲ ዋና ጸሐፊ  አቶ አንዳርጋቸው ጽጌ፣  የቀድሞዉ የአንድነት ለፍትሕ እና ለዴሞክራሲ ምክትል ሊቀመንበር አቶ አንዱዓለም አራጌ፣ የልብ ሕክምና ባለሙያው ዶክተር ፍቅሩ ማሩ፣ እና  የፌደራሉ ጠቅላይ አቃቤ ሕግ ባቀረበው ጥያቄ መሰረት  ክሳቸው ከተቋረጠ መካከል የግንቦት 7 የፍትሕ፤ የነፃነት እና የዴሞክራሲ መሪ ዶክተር ብርሃኑ ነጋ እና የኦሮሞ ሚዲያ ኔትዎርክ፣ በምህፃሩ ኦ ኤም ኤን ዋና ስራ አስኪያጅ ጃዋር መሀመድ፣ እንዲሁም፣  ኢሳት እና ኦ ኤም ኤን የቴሌቪዥን ጣቢያዎች፣  አቶ መላኩ ፈንታ፣ አቶ ገብረዋሕድ ገብረሥላሴ፣ አቶ ዓለማየሁ ጉጆና ሌሎች ባለሥልጣናት ባለሀብቶች ይገኙባቸዋል።

ቀደም ባሉ ሳምንቶችም እስከቅርብ ጊዜ በፊት ድረስ ከኢትዮጵያ ዉጪ ሲንቀሳቀሰዉ የነበረው የተቃዋሚው ፓርቲ የኦሮሞ ዴሞክራሲያዊ ግንባር፣ ኦዴግ ከመንግሥት ጋር በደረሰው ስምምነት መሰረት የፓርቲዉ አመራሮች በኢትዮጵያ ሰላማዊ የፖለቲካ ትግል ዉስጥ ለመሳተፍ አዲስ አበባ ገብተዋል። ይህ አሁን እየታየ ያለው የታሳሪዎች ፣ የታዋቂ ፖለቲከኞች እና ጋዜጠኞች መፈታት እና ክሳቸው መቋረጥ በሀገሪቱ የወደፊት የፖለቲካ ሂደት ላይ ስለሚኖረው አንደምታ ውይይት አካሂደናል።

ሙሉ ዝግጅቱን ከድምፅ ማዕቀፉ መከታተል ይቻላል።

አርያም ተክሌ

እሸቴ በቀለ