ከአዲስ አበባ ጅቡቲ የሚያመራው መንገድ ተዘግቶ ዋለ

ከአዲስ አበባ አዋሽ እና የሰመራ ከተሞችን አቋርጦ ወደ ጅቡቲ የሚያመራው መንገድ ተዘግቶ ዋለ። ድሬዳዋ፣ ሐረር እና ጅግጅጋን ከዋና ከተማዋ የሚያገናኘው የመንገዱ ክፍልም  በአካባቢው ነዋሪዎች ተቃውሞ ግልጋሎት አቁሞ ታይቷል። የDW ዘጋቢ ዮሐንስ ገብረ እግዚዓብሔር ያነጋገራቸው እና በተቃውሞው የሚሳተፉ የአፋር ክልል ነዋሪዎች ጥያቄዎቻችን ምላሽ ሊሰጣቸው ይገባል በማለት መንገድ መዝጋታቸውን ተናግረዋል። የአፋር እና የሶማሌ ክልል በይገባኛል የሚወዛገቡባቸው አካባቢዎች ለሶማሌ ክልል ሊሰጡ ነው የሚል መረጃ ለተቃውሞ እንዳበቃቸውም ገልጸዋል።

በማኅበራዊ ድረ-ገፆች የተሰራጩ ምስሎች ከአዲስ አበባ ወደ ምሥራቁ የኢትዮጵያ ክፍል በሚያመራው መንገድ በርከት ያሉ ተሽከርካሪዎች ቆመው አሳይተዋል። የክልሉን ሰንደቅ ዓላማ የሚያውለበልቡ እና በአውራ ጎዳናው መካከል ድንኳን ጥለው ተሽከርካሪ እንዳይተላለፍ ያገዱ ነዋሪዎችም ነበሩ። ከተሽከርካሪዎች በተጨማሪ ከኢትዮጵያ ወደ ጅቡቲ የሚያመራው የባቡር አገልግሎት በተቃውሞው ሳቢያ ተቋርጧል። ዮሐንስ ገብረ እግዚዓብሔር መንገድ የዘጉ ተቃዋሚዎችን ለምን ሲል ጠይቋቸዋል።
ዮሐንስ ገብረ እግዚዓብሔር
እሸቴ በቀለ