ተቃዋሚው የሐረሪ ዴሞክራሲዊ ድርጅት ከ12 አመታት በኋላ ወደ ሐረር ተመለሰ

የሐረሪ ዴሞክራሲዊ ድርጅት ሊቀመንበር አቶ አብዲ ሰቡር ለዶይቼ ቬለ (DW) በስልክ እንደገለፁት ድርጅቱ ካለፉት አመታት ጀምሮ ከሀብሊ ጋርም ሆነ ወደ ክልሉ ገብቶ ቢሮ መክፈት እና መንቀሳቀስ ሳይችል ቆይቷል፡፡ መቀመጫውን አዲስ አበባ አድርጎ ሲታገል የቆየው የሐረሪ ክልል ተቃዋሚ ፓርቲ ከ12 አመታት በኋላ ለመጀመርያ ጊዜ ክልሉ የተመለሰው በክልሉ ያለው አዲስ አመራር ባቀረበው ጥሪ መሰረት መሆኑን አስረድተዋል፡፡ በሀገሪቱ የተፈጠረውን ለውጥ ተከትሎ ከወራት በፊት ላለፉት አመታት ክልሉን እና ሐብሊን በበላይነት ሲመሩ የቆዩት የክልሉ ርዕሰ መስተዳድር አቶ ሙራድ አብዱልሀዲ ከሀላፊነት ተነስተው አቶ ሁርዲን በድሪ በሀላፊነት መሾማቸው የሚታወስ ነው ፡፡ 

የሐዲድ ሊቀመንበር ድርጅታቸው በሐረሪ ክልል ጽህፈት ቤት መክፈት እና አባላት ማደራጀት “ቀጣይ እና ዋነኛ ስራው” እንደሚሆን ተናግረዋል። ሐዲድ በቀጣዩ ሀገራዊ ምርጫ እንደሚሳተፍም አረጋግጠዋል፡፡

የሐረሪ ብሄራዊ ሊግ (ሐብሊ) ተወካይ እና የእርቀ ሰላም መድረኩ አስተባባሪ አቶ አሚር አሊ መድረኩ የሐረሪ ህዝብ ያሉበትን ችግሮች ለመፍታትና የተቀናጀ ስራ ለመስራት የክልሉ ገዢ ፓርቲ ለፖለቲካ ፓርቲዎች እና ለክልሉ ህዝብ በአጠቃላይ ጥሪ በማድረጉ የተካሄደ መሆኑን ተናግረዋል፡፡ “በተቃዋሚ ወይም ተፎካካሪ ድርጅቶች የሚከናወኑ ተግባራትን ለመደገፍ የክልሉ ገዢ ፓርቲ ዝግጁ ነው” ያሉት አስተባባሪው “የእነሱ በክልሉ መኖር ለሀብሊም ሆነ ለክልሉ ህዝብ ጠቃሚ ነው” ሲሉ ለዶይቼ ቬለ ተናግረዋል፡፡ “ቢሮ ከፍቶ መስራትና መንቀሳቀስ በክልሉ ገዢ ፓርቲ የሚፈቀድ አሊያም የሚሰጥ ሳይሆን ህገ መንግስታዊ መብት ነው” ሲሉም አክለዋል። 

መሳይ ተክሉ

እሸቴ በቀለ

ተስፋለም ወልደየስ