جرمن سیاستدانوں کی جانب سے ترقیاتی امداد میں کمی کی دھمکی

چانسلر میرکل کی جماعت کرسچین ڈیموکریٹک یونین (سی ڈی یو) اور اس کی اتحادی پارٹی کرسچین سوشل یونین (سی ایس یو) کا کہنا ہے کہ جرمنی میں جن ممالک کے شہریوں کی سیاسی پناہ کی درخواستیں رد ہو چکی ہیں اور ان کی ملک بدری کے احکامات کے باوجود ان کے آبائی ممالک کی حکومتیں برلن حکومت سے تعاون نہیں کر رہیں، ان ریاستوں کو دی جانے والی ترقیاتی امداد کو یا تو کم یا پھر مکمل طور پر بند کر دیا جانا چاہیے۔

اس کی وجہ سی ڈی یو سے تعلق رکھنے والے جرمن صوبے سیکسنی کے وزیر اعلیٰ میشائل کریچمر نے یوں بیان کی کہ ملک بدری کے زیادہ تر فیصلوں پر عمل درآمد اس وجہ سے نہیں ہو پاتا کیونکہ جن ممالک کے شہریوں کو جرمنی سے واپس بھیجنا ہوتا ہے، ان کے جرمنی میں قائم سفارت خانے تعاون نہیں کرتے اور ملک بدری کے لیے ضروری کاغذات مہیا نہیں کرتے۔ انہوں نے مزید کہا کہ بہرحال اب اس مسئلے کا کوئی حل نکالا جانا لازمی ہے، ’’ایسا نہیں ہو سکتا کہ ایک طرف ہم ترقیاتی امداد دیں اور دوسری جانب یہ ممالک اپنے شہریوں کو واپس قبول نہ کریں۔‘‘

تارکِ وطن کی ملک بدری، جرمن پولیس اور مہاجرین میں تصادم

نصف سے زائد مہاجرین جرمن زبان کے امتحان میں فیل

شرابیوں نے دو مہاجرو‌ں پر کتے چھوڑ دیے

اسی طرح صوبے باویریا کے وزیر داخلہ یوآخم ہیرمان (سی ایس یو) نے تجویز پیش کی ہے، ’’عدم تعاون کا رویہ رکھنے والے ممالک کو ترقیاتی امداد جیسی رعایت نہیں دی جانا چاہیے۔‘‘ ان دونوں سیاستدانوں نے موجودہ شکل میں سیاسی پناہ کے درخواست گزاروں کو دی جانے والی سہولیات میں کمی کا مطالبہ بھی کیا ہے۔

کریچمر کے مطابق اس تناظر میں تمام یورپی ریاستوں میں قوانین ایک جیسے ہونا چاہیں، ’’ لوگوں کے پاس یہ اختیار نہیں ہونا چاہیے کہ وہ کسی بھی حکومت کی جانب سے دی جانے والی سہولیات کو دیکھتے ہوئے سیاسی پناہ کی درخواستیں جمع کرائیں اور باقاعدگی سے جرمنی کا رخ کریں۔‘‘

جرمنی میں اس موضوع پر بحث صوبے باڈن ورٹمبرگ میں رونما ہونے والے اس تازہ واقعے کے بعد شدید ہوئی ہے، جس میں ٹوگو سے تعلق رکھنے والے ایک تئیس سالہ نوجوان کو اٹلی بھیجا جانا تھا اور  ڈیڑھ سو کے قریب مہاجرین نے پولیس کی اس کارروائی میں رکاوٹیں ڈالنے کی کوشش کی تھی۔ بعد ازاں پولیس نے بھاری نفری کے ساتھ اس نوجوان کو حراست میں لے کر ملک بدری کے لیے قائم ایک مرکز میں پہنچا دیا تھا۔