ترکی کے ساتھ یورپی ڈیل، سینکڑوں تارکین وطن متاثر

خبر رساں ادارے ڈی پی اے سے بات چیت کرتے ہوئے کناؤس نے کہا کہ اس ڈیل کی وجہ سے سینکڑوں تارکین وطن بحیرہء ایجیئن کے کناروں پر واقع شہروں میں پھنسے ہوئے ہیں اور نہایت خستہ حالی کا شکار ہیں۔

یونان سے بہت کم مہاجرین ترکی واپس بھیجے جا سکیں گے

مہاجرین کے بحران کا مقابلہ مل کر، جنوبی یورپی ممالک کا اصرار

ایردوآن یورپی یونین کے ساتھ بہتر تعلقات کے لیے کوشاں

18 مارچ 2016 کو یورپی یونین اور انقرہ حکومت کے درمیان طے پانے والے اس معاہدے کے تحت انقرہ حکومت کی مالی اعانت کی جا رہی ہے تاکہ وہ ترکی میں مقیم مہاجرین کے معیار زندگی کو بہتر بنائے جب کہ اس ڈیل میں ترک شہریوں کو یورپی ممالک کے سفر کے لیے ویزے کی پابندی سے آزاد کرنے کا وعدہ بھی کیا گیا تھا، جس پر عمل درآمد نہ ہو سکا۔

کناؤس نے کہا کہ ان کی تیار کردہ یہ ڈیل ایک طرح سے غیرفعال معلوم ہو رہی ہے اور اس کی وجہ سے بحیرہء ایجیئن میں واقع مختلف جزائر میں سینکڑوں تارکین وطن پھنس کر رہ گئے ہیں، ’’ہمیں تبدیلی کی ضرورت ہے۔ سیاسی پناہ کی درخواستوں کو نمٹانے کے عمل میں شفافیت لانے کی ضرورت ہے اور یورپی یونین کی بیرونی سرحدوں کو محفوظ بناتے ہوئے تارکین وطن کو تیز رفتاری سے واپس بھیجنے یا انہیں تحفظ دینے کی ضرورت ہے۔‘‘

واضح رہے کہ یورپی یونین اور انقرہ حکومت کے درمیان اس معاہدے کی تیاری میں کناؤس بھی پیش پیش تھے۔ اس معاہدے میں ترکی کو پابند بنایا گیا تھا کہ وہ ایسے تمام تارکین وطن کو قبول کرے گا، جو اس کے ہاں سے یونان پہنچیں گے، جب کہ واپس بھیجے جانے والے ہر غیرقانونی تارک وطن کی جگہ ترکی میں مقیم ایک شامی باشندے کو یورپ میں بسائے جائے گا۔ معاہدے کی اس شق پر بھی عمل درآمد میں نہایت سست روی دیکھی گئی ہے۔

کناؤس، جو اس وقت یورپیئن سٹیبیلٹی انیشیٹیو (ESI) کی سربراہی کر رہے ہیں، نے مزید کہا، ’’جب تک اس ڈیل پر پوری طرح عمل درآمد نہیں ہو گا، یورپی یونین تارکین وطن کو اپنی طرف کھینچتی رہے گی۔ جب تک تارکین وطن یورپ پہنچنے پر یہاں طویل قیام کرتے رہیں گے اور تیزی سے واپس نہیں بھیجے جائیں گے، مزید مہاجرین یورپ پہنچتے رہیں گے۔‘‘