Watu zaidi kuyahama makaazi yao

Shirika  la  kuwahudumia  wakimbizi  UNHCR  limesema  kuwa  sababu  hizo  ni  pamoja  na  ukimbizi  wa   kiuchumi, mabadiliko ya tabia nchi , ukosefu wa chakula , na mapigano.

Mkuu wa Shirika hilo la  kuwahudumia  wakimbizi duniani UNHCR Antonio Guterres ametoa sababu nyingine kuwa uhaba wa maji, mashindano ya kutafuta rasili mali na pia ongezeko la watu duniani. Antonio aliyasema hayo alipokuwa akizundua ripoti hiyo katika makao makuu  ya Umoja wa mataifa mjini New York .

Kwa sasa kuna takriban watu milioni 26 waliokosa makaazi ndani ya nchi zao huku idadi ya watu milioni 15-16 wakiwa ni wakimbizi na wengine Millioni moja wakiomba hifadhi  ya  kisiasa katika mataifa ya  nje. Hata hivyo shirika hilo halikutoa idadi ya watu wanaokadiriwa kuongezeka kwa miaka kumi ijayo.

Hatua  za  pamoja

Antonio Guterres amesema hili ni suala la kimataifa na linapaswa kutafutiwa suluhisho la kimataifa huku akisisitiza kuwepo pia kwa suluhisho la kisiasa.

"Wakimbizi wengi hungoja suluhu ya kisiasa ipatikane nchini mwao ili waweze kurudi nyumbani na kuishi maisha ya kawaida" lilisema shirika hilo la kuwashughulikia wakimbizi duniani UNHCR.

Wakimbizi  hukabiliwa  na  hali  ngumu ya  maisha

Ripoti hii ya kila mwaka imetoa sura ya  hali halisi ya wakimbizi wa nje ya nchi na wale waliokosa makaazi ndani ya nchi zao. Wakimbizi hujikuta katika hali ngumu ya maisha iliojaa changamoto nyingi hasaa katika suala la kupata suluhisho huku wafanyakazi wa kutoa misaada wanaowasaidia wakikabiliana na vitisho kutoka  maeneo yaliyoathirika.

Hata hivyo Mkuu wa UNHCR Antonio Guterres amesema kwa sasa ni nchi nyingi tu zilizofungua mipaka yake kuwapokea wakimbizi ambao nchi zao zinakumbwa na ghasia  na machafuko ikiwemo wale waliokimbia nchi zao kutokana na  maandamano ya kutaka mabadiliko nchini mwao katika maeneo ya kaskazini mwa Afrika na Mashariki ya kati.

Mwandishi :Amina Abubakar/DPA

Mhariri :Mohammed Abdul-Rahman