1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Viongozi wa Umoja wa Ulaya wamtaka Assad ang'oke madarakani

Viongozi wa taifa na serikali wa nchi 27 za umoja wa ulaya wamemaliza mkutano wa siku 2 kwa kukubaliana kuhusu mikakati ya kumaliza migogoro ya fedha katika kanda ya Euro,na kuhimiza umwagaji damu ukome Syria

default

Mwenyekiti wa baraza la Ulaya Van Rompuy akizungumza na waandishi habari mjini Brussels

Viongozi wa taifa na serikali wa Umoja wa Ulaya wanahisi mapambano yao dhidi ya migogoro ya fedha yamepata nguvu.Wameonyesha kuridhika kwao hii leo na makubaliano kadhaa yaliyofikiwa katika muda wa saa 48 za majadiliano kwa lengo la kuleta utulivu zaidi katika kanda ya Euro.

Umoja wa Ulaya bado haujazungumzia namna ya kugharimia kwa muda mkakati wa aina moja wa kulipia madeni ya benki za kanda ya Euro hadi michango itakayokusanywa na benki itakapotosha kudhamini kikamilifu shughuli za benki hizo.

"Bado kuna mengi ya kufanya na majadiliano kuendelezwa" amesema mwekiti wa baraza la Ulaya Herman Van Rompuy wakati wa mkutano pamoja na waandishi habari.

Kwa upande wake kansela Angela Merkel amesema:"Tumedhamiria hadi mwezi June mwakani tufafanue kwa upande mmoja kuhusu mikataba kati ya halmashauri kuu ya Umoja wa Ulaya na mataifa wanachama pamoja na kuimarisha mbinu za kushindana kibiashara na kwa upande wa pili tubuni njia ya namna ya kupatikana fedha."

)

Mwenyekiti wa halmashauri kuu ya Umoja wa Ulaya Jose Manuel Barroso

Halmashauri kuu ya Umoja wa Ulaya inapanga kuwasilisha pendekezo lake kuhusu mkakati huo mapema mwakani.

Katika kikao cha jana viongozi wa taifa na serikali wa Umoja wa Ulaya walikubaliana mkakati huo ugharimiwe kutokana na michango ya sekta binafsi ya fedha na liundwe fuko maalum kwaajili hiyo.

EU Gipfel in Brüssel Deutschland Angela Merkel

Kansela Angela Merkel (mbele)akiondoka mkutanoni mjini Brussels

Baada ya kuzungumzia mbinu za kuimarisha utulivu katika zoni ya Euro viongozi wa Umoja wa Ulaya waliliingilia pia suala la Syria.Kama ilivyokuwa ikitarajiwa viongozi wa mataifa 27 ya taifa na serikali za umoja wa ulaya wametoa mwito wa kukomeshwa umwagaji damu na kung'oka madarakani rais wa Syria Bashar al Assad."Mustakbal wa Syria utawezekana tu ikiwa Assad hatokuwepo madarakani" amesema kansela Angela Merkel mwishoni mwa mazungumzo ya viongozi wa Umoja wa Ulaya mjini Brussels,huku rais Francois Hollande akitilia mkazo lengo linabidi kuwa "kumuona Assad aking'oka haraka madarakani".

Hata hivyo suala la kupunguza makali ya vikwazo vya silaha kwa Syria halijazungumzwa amesema kansela Merkel.

Mwandishi: Hamidou Oummilkheir/dpa/AFP/Reuters

Mhariri: Josephat Charo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com