1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Umoja wa Ulaya una wasiwasi juu ya Ugiriki

Baada ya chaguzi kufanyika nchini Ufaransa na Ugiriki, wasiwasi umetanda katika Umoja wa Ulaya kuhusu kuzuka kwa mgogoro mpya wa sarafu ya Euro. Hili linakuja wakati ambapo vyama vya Ugiriki vimeshindwa kuunda serikali.

Nembo ya sarafu ya euro

Nembo ya sarafu ya euro

Kwa kawaida kamisheni ya Umoja wa Ulaya haitoi maoni yake juu ya matokeo ya uchaguzi. Lakini suala la Ugiriki ni tofauti kwani linahatarisha Umoja huo, kwa ujumla. Wagiriki wengi wamevipigia kura vyama vilivyo na mashaka juu ya hatua za kufunga mkaja au vyama vinavyopinga kabisa hatua hizo. Kwa hivyo, huenda serikali mpya ikazipuuza hatua za kubana matumizi zilizoidhinishwa na Umoja wa Ulaya. Msemaji wa Kamisheni ya Umoja huo, Bi Pia Ahrenkilde, ameonya: "Kamisheni inatarajia na kutumaini kwamba serikali mpya ya Ugiriki itayafuata makubaliano yaliyofikiwa."

Wagiriki wakipiga kura

Wagiriki wakipiga kura

Msemaji huyo ameongezea kusema kwamba Umoja wa Ulaya uko tayari kuendelea kuiunga mkono Ugiriki na unatarajia kwamba patakuwepo na hali ya uwajibikaji katika kuunda serikali mpya. Amadeu Altafaj, ambaye ni msemaji wa Kamishna wa fedha wa Umoja wa Ulaya alisisitiza: "Tunaweza kufanya mambo mengi kuisaidia Ugiriki na tunafanya hivyo," alisema Altafaj. "Nchi mwanachama na walipa kodi katika nchi zote zinazotumia sarafu ya Euro wanatoa mshikamano. Lakini mshikamano si jukumu la upande mmoja tu."

Mpango kabambe wahitajika

Kiongozi wa chama cha EPP cha Ugiriki, Joseph Daul

Kiongozi wa chama cha EPP cha Ugiriki, Joseph Daul

Joseph Daul ni mwenyekiti wa chama cha kihafidhina cha Ugiriki katika bunge la Umoja wa Ulaya na ameelezea kwamba anahofia kuwa matokeo ya uchaguzi wa Ugiriki yanaweza kuifanya nchi hiyo ikajitoa katika Umoja wa sarafu ya Euro, pale ambapo chama kitakachochaguliwa kuiongoza serikali kitakapokataa kufuata maagizo ya kubana matumizi na kufanya mabadiliko ya sera.

Lakini rais wa bunge la Umoja wa Ulaya, Bw. Martin Schulz, ameonya juu ya kufanya maamuzi kwa pupa. Yeye pia amevitaka vyama vya kisiasa vya Ugiriki kuunda serikali ya mseto itakayofuata masharti ya Umoja wa Ulaya. Umoja huo, kwa upande wake, unapaswa kuandaa programu ya kuleta ukuaji wa kiuchumi na kuongeza ajira kwa wagiriki.

Wazo hilo linaoana na wazo la Jorgo Chatzimarkakis ambaye ni mbunge wa cha kiliberali cha FDP cha Ujerumani katika bunge la Umoja wa Ulaya. Mwanasiasa huyo, mwenye asili ya Kigirki, ameiambia Deutsche Welle kwamba si Ugiriki tu, bali hata Ufaransa, Uhispania na Ireland zinazohitaji mpango kabambe wa kukuza uchumi.

Mwandishi: Christoph Hasselbach

Tafsiri: Elizabeth Shoo

Mhariri: Othman Miraji

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com