1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Ugiriki: Tutapata usaidizi kutoka nchi nyengine

Waziri wa ulinzi wa Ugiriki Panos Kammenos amesema iwapo nchi hiyo itashindwa kupata makubaliano na kanda ya nchi zinazotumia sarafu ya Yuro kuhusu deni lake, inaweza kutafuta usaidizi kutoka mataifa mengine.

Waziri wa ulinzi wa Ugiriki Panos Kammenos na Waziri Mkuu wa Ugiriki Alexis Tsipras

Waziri wa ulinzi wa Ugiriki Panos Kammenos na Waziri Mkuu wa Ugiriki Alexis Tsipras

Akizungumza na kituo cha televisheni cha Ugiriki, Waziri Panos Kammenos amesema na hapa ninamnukuu "Kile tunachotaka ni makubaliano lakini iwapo makubaliano hayo hayatafikiwa na tukiona Ujerumani ina ugumu kutekeleza hayo na inataka kuisambaratisha Ulaya basi tutakwenda katika mpango wa pili ambao ni kupata fedha kupitia chanzo kingine." Mwisho wa kumnukuu.

Waziri huyo amesema huenda Marekani, Urusi, China au mataifa mengine yakawa katika orodha ya mataifa yatakayoombwa msaada.

Kammenos ni kiongozi wa chama cha kizalendo cha Independent Greeks kinachopinga mpango wa kubana matumizi ambacho ni chama kidogo kilichoungana na chama cha mrengo wa kushoto cha Syriza cha Waziri Mkuu Alexis Tsipras.

Waziri Mkuu wa Ugiriki Alexis Tsipras

Waziri Mkuu wa Ugiriki Alexis Tsipras

Ugiriki inatafuta makubaliano mapya na kanda inayotumia sarafu ya Yuro ili kujiondoa katika mpango wa kubana matumizi uliowekwa kama sharti la nchi hiyo kupata mkopo wa kujikwamua na madeni na nchi za Umoja wa Ulaya pamoja na shirika la fedha la Kimataifa IMF mwaka 2010.

Ujerumani haina nia ya kulegeza masharti kwa Ugiriki.

Hata hivyo nchi za kanda ya yuro na hasa Ujerumani haijaonesha nia yoyote ya kulegeza masharti yake kwa Ugiriki. Huku hayo yakiarifiwa Waziri wa fedha wa Ujerumani Wolfgang Schaeuble, amesema iwapo Ugiriki inataka usaidizi inapaswa kuwepo na mpango utakaokubaliwa na wakopeshaji badala ya kufikiria usaidizi wa dharura.

Aidha Waziri Mkuu Alexis Tsipras atakutana siku ya Jumatano na na Angel Gurria, mwenyekiti wa shirika la ushirikiano wa kiuchumi na maendeleo kuzungumzia pendekezo la Ugiriki ya kutokuwa na masharti ya kubana matumizi siku moja kabla ya kufanyika mkutano wa kilele wa Umoja wa Ulaya mjini Brussels siku ya Alhamisi.

Kansela wa Ujerumani Angela Merkel

Kansela wa Ujerumani Angela Merkel

Hata hivyo kabla ya mkutano huo muhimu,rais wa Halmashauri kuu ya Umoja wa Ulaya Jean Claude Junker ameitahadharisha Ugiriki juu ya kujitenga na Umoja huo.

Halikadhalika Juncker ameitaka Ugiriki kutofikiria kwamba mtazamo wa Umoja huo umebadilika na kwamba nchi zinazotumia sarafu ya Euro zinaweza tu kuridhia mapendekezo ya Waziri Mkuu Tsipras bila ya masharti.

Akizungumza siku moja baada ya mkutano wa Mawaziri wa fedha wa Umoja wa Ulaya, Juncker ameongeza kuwa hataraji makubaliano yoyote kufikiwa juu ya Ugiriki katika mkutano jumla wa Umoja huo mjini Brussels.

Mwandishi: Amina Abubakar/Reuters

Mhariri: Yusuf Saumu

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com