1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Njama ya mapinduzi Yemen

Wanamgambo wa kishia wameendeleza mapigano makali dhidi ya jeshi katika mji mkuu wa Yemen Sanaa katika kile kinachoangaliwa kama mtihani mkubwa kwa utawala wa rais Abdrabuh Mansur Hadi.

default

Mapigano Sanaa

Wanamgambo wa kishia wameendeleza mapigano makali dhidi ya jeshi katika mji mkuu wa Yemen Sanaa na magari yaliyoandamana na lile la waziri mkuu yameshambuliwa katika kile kinachoangaliwa kama mtihani mkubwa kwa utawala wa rais Abdrabuh Mansur Hadi.

Njama ya mapinduzi imetokea pale kundi la watu waliokuwa na silaha walipolihujumu kasri la rais mjini Sanaa-mji mkuu wa Yemen uliogubikwa na mapigano makali kabisa kuwahi kushuhudiwa tangu mwezi wa septemba mwaka jana.Milio ya risasi imehanikiza na moshi kutanda katika mji mkuu wa Yemen Sanaa.

Wanamgambo wanaojulikana kama Huthi,wanadhibiti hivi sasa vyombo vya habari vya taifa na kuzidi kujiimarisha katika mji huo mkuu .Wanamgambo wa huthi wamekiteka pia kituo cha kijeshi kilichoko mlimani karibu na kasri la rais.

Watu wasiopungua watano wameuwawa na wengine 20 kujeruhiwa katika mapigano karibu na kasri la rais na katika maeneo mengine ya mji mku-hayo ni kwa mujibu wa duru za hospitali.

Waziri mkuu Khalid Bahah amenusurika chupu chupu pale wanamgambo wa Huthi walipofyetulia risasi mlolongo wa magari yaliyoandamana na gari yake walipotoka katika kasri la rais Abdrabuh Mansur Hadi.Hayo ni kwa mujibu wa waziri wa habari Nadia Sakkaf.

Huthi wanadai madaraka makubwa zaidi

Kämpfe in Sanaa 19.01.2015 die Bevölkerung ergreift die Flucht

Watu wanayapa isogo maskani yao

Waziri mkuu Bahah alikuwa na mazungumzo pamoja na rais na mwakilishi wa wanamgambo wa Huthi katika juhudi za kufikia makubaliano ya kuweka chini silaha,magari hayo yalipofyetuliwa risasi.Na lile la mwakilishi wa wanamgambo wa Huthi pia limehujumiwa waziri wa habari Nadia Sakkaf amesema.

Wakaazi wa Sanaa hawajui chanzo halisi cha mapigano hayo mepya.

"Nilikuwa njiani kwenda kazini leo asubuhi katika mtaa wa Hadda,nilipowaona watu waliobeba silaha wameenea kila pembe.

Wakiangaliwa kama washirika wa Iran katika mapaigano ya kuania ushawishi dhidi ya Saud Arabia,wanamgambo wa Huthi wanaowakilishwa katika serikali ya mjini Sanaa hivi sasa,wanasema "hali haitotulia" ikiwa madai yao ya kugawana sawa madaraka na kutungwa katiba mpya hayatotekelezwa.Wahuthi wanadai haki zaidi kwa jamii ya Zaydi ya kishia nchini humo na wanaendesha kampeni dhidi ya rushwa.

Wito wa kusitisha mapigano

Kämpfe in Sanaa 19.01.2015

Mapigano Sanaa

Mswaada wa katiba,ulioanzishwa jumamosi iliyopita umelenga kutatua matatizo ya kimkoa lakini wahuthi wanahofia katiba hiyo isije ikawapunguzia madaraka.

Wakati huo huo jumuia ya nchi za kiarabu imezisihi pande zote zinazohusika zisitishe mapigano nchini Yemen na kuheshimu viongozi halali wa nchi hiyo.

Mwadishi:Hamidou Oummilkheir/AFP/AP/Reuters/

Mhariri:Josephat Charo

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com