1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Mchakato wa kuunda serikali mpya Iraq kuanzishwa hivi karibuni

Serikali ya Iraq imetangaza kuwa kikao cha bunge kitafanyika Julai mosi, ili kuanzisha mpango wa kuunda serikali mpya huku nchi hiyo ikikabiliwa na uasi unaotishia umoja wa taifa hilo.

Waliojitolea kuungana na jeshi la Iraq kupambana na uasi

Waliojitolea kuungana na jeshi la Iraq kupambana na uasi

Taarifa ya kuitishwa kikao hicho imetolewa na makamu wa rais Khudair al-Khuzai, ambaye ni kaimu rais kwa sasa na aliyemshirika wa karibu wa Waziri Mkuu Nouri al Maliki.

Miezi mitatu baada ya kufanyika uchaguzi mkuu nchini humo sauti za kimataifa na zile za ndani ya Iraqi zimesikika zikitoa wito wa kuanzishwa mara moja mchakato wa kuundwa kwa serikali mpya.

Kwa upande mwengine kiongozi wa kidini wa madhehebu ya shia aliye na ushawishi mkubwa Moqtada al-Sadr ameapa kukabiliana na wapiganaji wa kisuni walio na siasa kali. Hatua inayotishia wasiwasi zaidi wa mapigano ya kidini katika mgogoro unaozidi kuwagawanya wairaq.

Kiongozi wa kidini wa madhehebu ya shia Moqtada al-Sadr

Kiongozi wa kidini wa madhehebu ya shia Moqtada al-Sadr

"Cha kwanza mapigano na visa vya ugaidi kwa raia ni lazima visitishwe, pili, naiomba serikali ya iraq kutimiza matakwa ya wasuni waliotengwa na kubaguliwa na tatu kuharakisha kuundwa kwa serikali ya kitaifa itakayokuwa na sura mpya itakayoyajumuisha makundi yote ya kidini nchini Iraq", Alisema Sadr.

Akizungumza katika mji mtakatifu wa Najaf, Moqtada al-Sadr ameonya kuwa mataifa yote ya kigeni na yale jirani na Iraq yanapaswa kuwacha kabisa kuingilia mgogoro wa Iraq. Matamshi yake yanakuja wakati vikosi vya serikali bado vinapambana na wapiganaji wa kisunnni ambao wameyateka miji kadhaa nchini Iraq.

Kwa sasa wapiganaji watiifu kwa Moqtadar al Sadr wamesema wako tayari kupamabana na uasi nchini humo.

Wanasiasa walio na uhasama waomba kuungana dhidi ya kundi la ISIL

Wakati huo huo Waziri Mkuu Nouri al Maliki amewaonya maadui dhidi ya kuutumia mgogoro huo na kumtenga baada ya Marekani kuwasisitizia viongozi wa kisiasa walio na uhasama kuungana kupambana na kundi la kigaidi la dola la kiislamu la Iraq na eneo la Sham ISIL.

Rais wa Marekani Barrack Obama

Rais wa Marekani Barrack Obama

Rais wa Marekani Barrack Obama hajatoa hakikisho la kutekeleza shambulizi la angani aliloombwa kufanya na Iraq ili kukabiliana na wapiganaji wa kisuni walio na itikadi kali.

Badala yake Obama ametuma washauri wa kijeshi 300 ambao wameshaanza kukutana na makamanda wa Iraqi tangu jana Jumatano.

Kwengineko Waziri wa mambo ya nchi za nje wa Uingereza William Hague amefanya ziara ya kushtukiza mjini Baghdad kuwashinikiza viongozi wa kisiasa wa Iraq kuungana pamoja kukabiliana na wapiganaji hao wa kisuni.

Mwandishi Amina Abubakar/AFP/Reuters

Mhariri: Mohammed Abdul-Rahman

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com