1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Mazungumzo ya amani Syria kuanza Januari 25

Umoja wa Mataifa unatarajia kuandaa mazungumzo ya amani baina ya serikali ya Syria na waasi yatakayofanyika tarehe 25 Januari kwa lengo la kukomesha vita vya miaka minne sasa, ambavyo vimeuwa watu zaidi ya 250,000.

Staffan de Mistura, mjumbe maalum wa Umoja wa Mataifa kuhusu Syria

Staffan de Mistura, mjumbe maalum wa Umoja wa Mataifa kuhusu Syria

Taarifa iliyotolewa na ofisi ya mjumbe wa Umoja wa Mataifa kwa Syria, Staffan de Mistura, imesema matarajio yao ni kwamba makundi yote ya wapinzani yatashiriki katika mazungumzo hayo yatakayofanyika mjini Geneva. ''[Staffan de Mistura] anategemea ushirikiano kamili wa wadai wote katika mzozo wa Syria, ili kufanikisha mchakato huo'', ilisema taarifa hiyo iliyotolewa Jumamosi (26 Disemba).

Mazungumzo hayo yatakuwa hatua ya kwanza ya mpango wa miezi 18 ulioidhinishwa na Baraza la Usalama la Umoja wa Mataifa katika juhudi za kuvimaliza vita vya Syria ambavyo vimewauwa watu zaidi ya 250,000.

Changamoto ya kifo cha kamanda wa waasi

Zahran Alloush, Kamanda wa waasi aliyeuawa

Zahran Alloush, Kamanda wa waasi aliyeuawa

Hata hivyo, mchakato huo unakabiliwa na changamoto kufuatia kuuawa kwa kamanda wa kikundi cha upinzani kijulikanacho kama Jaish al-Islam, Zahran Alloush. Kamanda huyo aliuawa katika shambulizi la anga la jeshi la serikali, ambalo liliulenga mkutano wa siri wa viongozi wa kikundi hicho. Baadaye ilithibitishwa kuwa Alloush mwenye umri wa miaka 44 alikuwa miongoni mwa waliouawa.

Jaish al-Islam, kikundi kinachoungwa mkono na Saudi Arabia, ni miongoni mwa makundi ya wasi yaliyoshiriki katika mkutano wa mwanzoni mwa mwezi huu wa Desemba mjini Riyadh, na kuridhia mazungumzo na serikali ya Rais Bashar al-Assad. Wachambuzi mbali mbali wamemwelezea kamanda huyo aliyeuawa kama mtu aliyekuwa na uwezo wa kuyaleta pamoja makundi ya upinzani, wakionya kifo chake kinaacha pengo kubwa katika makundi hayo.

Kifo cha Zahran Alloush pia kimekwaza shughuli ya kuwahamisha watu 4,000 wengi wao wakiwa wapiganaji wa jihadi kutoka wilaya iliyo Kusini mwa mji mkuu wa Syria, Damascus. Shughuli hiyo, kwa mujibu wa maafisa wa serikali, ililenga kuwahamisha wapiganaji hao kutoka Qadam, Hajar al-Aswad na kambi ya ya wakimbizi wa kipalestina iliyozingirwa ya Yarmuk, na kuwahamishia katika maeneo ya Kaskazini.

Chanzo cha habari kilicho karibu na taasisi za usalama kimesema zoezi la kuwahamisha wapiganaji hao limesitishwa, kwa sababu Jaish al-Islam ilikuwa na na jukumu la kuhakikisha usalama wa mabasi yanayowasafirisha kupitia Mashariki mwa Damascus kuelekea Raqa, ziliko ngome za kundi linalojiita Dola la Kiislamu (IS). Wengi wa wanajihadi hao ambao wangehamishwa, ni wanachama wa IS na washirika wao wa al-Nusra Front.

'Kejeli kwa mchakato wa amani'

Vita vya Syria vimeuwa watu zaidi ya 250,000 na kuharibu miundombinu

Vita vya Syria vimeuwa watu zaidi ya 250,000 na kuharibu miundombinu

Mwanachama wa ngazi ya juu wa kundi la waasi linaloungwa mkono na nchi za Magharibi la Syria National Coalition, Anas al-Abdeh amesema kuuawa kwa kamanda Alloush ni 'kejeli' kwa mpango wowote wa kutafuta suluhisho la kisiasa kuhusu mzozo wa Syria, na kuongeza kuwa kimeuhujumu mpango huo hata kabla ya kuanza.

Makundi mengine mengi ya waasi vile vile yameomboleza kifo cha Zahran Alloush, yakiushutumu utawala wa rais Assad na washirika wake, hasa Urusi, kuwa na njama ya kuyadhoofisha makundi ya upinzani kabla ya kuanza kwa mazungumzo.

Mwanachama muhimu wa kundi la Ahrar al-Sham amesema makundi ya wapinzani yanapaswa kufahamu kwamba yanakabiliwa na mpango wa maangamizi, unaoendeshwa na rais wa Urusi Vladimir Putin. Kujiingiza kwa Urusi kijeshi ndani ya Syria kumelipa nguvu jeshi la serikali ya Bashar al-Assad, kwa kuwauwa makamanda wengi wa waasi.

Mwandishi: Daniel Gakuba/afpe/dpa

Mhariri: Mohammed Khelef

DW inapendekeza

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com