1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Mashambulizi zaidi yafanywa Libya

Mashambulizi zaidi yameutikisa mji mkuu wa Libya, Tripoli kwa usiku wa tatu mfululizo tangu kundi la mataifa kumi ya Magharibi, ikiwemo Marekani, Ufaransa na Uingereza yalipoanzisha mashambulizi ya anga.

default

Rais Barack Obama wa Marekani

Mashambulizi hayo yameanzishwa katika kutekeleza marufuku ya ndege kuruka kwenye anga dhidi ya utawala wa kiongozi wa Libya, Kanali Muammar Gaddafi. Mjini New York, Baraza la Usalama la Umoja wa Mataifa limefanya kikao cha siri.

Wanadiplomasia wa Umoja wa Mataifa wamekaririwa na shirika la habari la Reuters wakisema kuwa baraza hilo limekataa ombi la waziri wa mambo ya nchi za nje wa Gaddafi la kufanyika mjadala wa dharura. Badala yake wamesema baraza hilo linaendelea na mipango yake ya kufanya kikao chake siku ya Alhamisi kutathmini matokeo ya marufuku hiyo.

Explosion Libyen Anti-Gaddafi Rebellen Bengasi

Moto ukisambaa baada ya kutokea mripuko nchini Libya

Kituo cha televisheni cha Al-Jazeera kimetangaza kuwa kambi mbili za jeshi la wanamaji la Libya zilizoko karibu na Tripoli, zinaonekana kushambuliwa katika saa za hivi karibuni. Taarifa za awali kutoka magharibi mwa Libya kwenye mji wa Zintan zilieleza kuwa wanajeshi watiifu kwa Kanali Gaddafi wamefyatua makombora na kuwalazimisha wakaazi wa eneo hilo kukimbia.

Wakati huo huo, Umoja wa Ulaya umekubaliana kuhusu vikwazo zaidi vya kiuchumi dhidi ya utawala wa kiongozi wa Libya, Kanali Muammar Gaddafi, vikiwalenga washirika 11 wa kiongozi huyo na mashirika tisa ya kiuchumi. Hiyo ni awamu ya tatu ya vikwazo vya umoja huo kwa Libya tangu serikali ianze kuwakandamiza waandamanaji wanaopigania demokrasia kwa mwezi mmoja sasa.

Waziri wa Mambo ya Nchi za Nje wa Ujerumani, Guido Westerwelle ameunga mkono vikwazo kama njia ya kumshinikiza Kanali Gaddafi ajiuzulu, huku akipinga uvamizi wa kijeshi. Pia ametetea uamuzi wa Ujerumani kutopiga kura katika Baraza la Usalama la Umoja wa Mataifa kuhusu kupiga marufuku ndege kuruka kwenye anga yake.

  • Tarehe 22.03.2011
  • Mwandishi Kabogo, Grace Patricia
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/10et3
  • Tarehe 22.03.2011
  • Mwandishi Kabogo, Grace Patricia
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/10et3

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com