1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Marekani yakaribia kuondoka Iraq kwa ahadi ya kuendeleza mahusiano

Wiki chache kabla ya kuondoka majeshi ya Marekani nchini Iraq, Rais Barack Obama amethibitisha kuendelea kwa msaada wa nchi yake kwa serikali ya Iraq licha ya kumalizika kwa operesheni ya kijeshi.

Rais Barack Obama na mgeni wake, Waziri Mkuu Nouri al-Maliki wa Iraq.

Rais Barack Obama na mgeni wake, Waziri Mkuu Nouri al-Maliki wa Iraq.

Ujumbe Rais Obama kwa mgeni wake haukuwa na shaka, nao ni kwamba "hadi kufikia mwaka ujao, vita vitakuwa vimeshamalizika nchini Iraq."

Lakini kauli ya Obama haitoki tu kwa kiongozi wa nchi, bali pia mgombea wa urais, ambaye lazima asimame mbele ya wapiga kura kwa uchaguzi wa mwakani. Na baada ya ahadi nyingi za kisiasa ambazo amezitoa ndani ya Ikulu ya Marekani na kushindwa kuzitimiza, jana Obama alisimama kwa majigambo ya kutangaza mafanikio yake, yaani mwisho wa vita vya Iraq.

"Huu ni wakati wa kurudi nyumbani. Familia nyingi za Wamarekani zinataka kuwa tena pamoja." Amesema Obama.

Obama pia ameanza kujenga ushawishi mpya wa Marekani kwa Iraq. Baina ya mataifa mawili haya huru na baada ya kuondoka kwa majeshi ya Marekani, sasa panaanza aina mpya ya uhusiano, na ambao msingi wake ni maslahi na heshima ya kila mmoja kwa mwenzake.

Majeshi ya Marekani yakijitayarisha kuondoka Iraq.

Majeshi ya Marekani yakijitayarisha kuondoka Iraq.

Obama amesema kwamba ni lazima sasa Iraq isimame kwa miguu yake yenyewe, akiyaeleza matarajio ya watu wa eneo zima la Ghuba na Mashariki ya Kati ni kuiona Iraq ikibeba hatima yake mikononi mwake na ikitatua tafauti za ndani kwa amani na kidemokrasia, licha ya tafauti za kidini na au kimadhehebu.

Wakati Obama alipokuwa akiyasema haya, waziri mkuu wa Iraq, Nuri al-Maliki, alitikisa kichwa kwa ishara ya kukubali na pia kuongeza maneno yake mwenyewe: "Hata mtu atakapolalamika kwa mengine, bado kuondoka kwa vikosi vya Marekani ni alama ya mafanikio."

Al-Maliki amesema sasa ukurasa wa kwanza wa kufanya kazi pamoja baina ya serikali hizo mbili ndani ya ardhi ya Iraq umefungwa na ukurasa mwengine umefunguliwa. Al-Maliki amesema ukurasa huo ni mwanzo wa mahusiano mapya na ya kimkakati baina ya Washington na Baghdad, ambapo ndani yake Iraq itahitaji msaada mkubwa katika kujenga taasisi zake, kiuchumi, kama vile kupatiwa mafunzo na uwezeshaji. Kuhusu hilo, Rais Obama alirudia uthibitisho wa nchi yake kwa raia wa Iraq, kwamba "Marekani itaendelea kuwa mshirika madhubuti na wa kuendelea."

Hata hivyo, Rais Obama aliyaonya mataifa mengine kutokuingilia mambo ya ndani. Bila ya kuitaja jina, hapana shaka alikusudia Jamhuri ya Kiislamu ya Iran, ambayo serikali ya Marekani inahofia kwamba kuondoka kwa vikosi vyake nchini Iraq, kutaliwezesha taifa hilo la Ghuba ya Uajemi kuongeza nguvu zake kwenye eneo hilo.

Mwandishi: Klaus Kastan/ZPR
Tafsiri: Mohammed Khelef
Mhariri: Othman Miraji

  • Tarehe 13.12.2011
  • Mwandishi Klaus Kastan/ZPR/Mohammed Khelef
  • Maneno muhimu Iraq
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/13Raf
  • Tarehe 13.12.2011
  • Mwandishi Klaus Kastan/ZPR/Mohammed Khelef
  • Maneno muhimu Iraq
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/13Raf

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com