1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Mahakama nchini Misri yasema kamwe haitabadili uamuzi wake

Mahakama kuu ya kikatiba nchini Misri imesema kuwa uamuzi wake wa kufutiliwa mbali kwa bunge nchini humo mwezi uliopita kamwe hautabadilika

Mahakama ya kikatiba nchini Misri

Mahakama ya kikatiba nchini Misri

Kauli hiyo imekuja saa chache baada ya rais mpya Mohammed Mursi kutoa agizo la bunge kufunguliwa tena. Kulingana na taarifa iliyotolewa na Mahakama Kuu, maamuzi yoyote kutoka katika korti hiyo ni ya mwisho na yanapaswa kuheshimiwa na wala hayapaswi kukatiwa rufaa.

Shirika la habari la nchi hiyo limenukuliwa likisema kwamba korti kuu imethibitisha kuwa uamuzi wake wa kulifuta bunge hautabadilika, jambo ambalo kwa sasa hivi limeonekana kuzua utata kati ya mahakama na jeshi kwa upande mmoja na Rais Mursi kwa upande mwengine.

Jeshi liliungana na hatua ya mahakama ya kikatiba kuvunja bunge ili kujipa madaraka ya kutunga sheria nchini Misri. Mahakama hiyo ilisema ilichukua uamuzi huo kwa kuwa thuluthi moja ya bunge hilo ilichaguliwa kwa njia isiyo halali.

Hatua hii ilikikasirisha chama cha Udugu wa Kiislamu ambacho kilikuwa na wajumbe wengi katika bunge hilo.

Rais Mpya wa Misri Mohammed Mursi

Rais Mpya wa Misri Mohammed Mursi

Wakili wa maswala ya katiba nchini humo Ibrahim Darwish awali alisema kwamba hatua ya Mursi huenda ikayumbisha amani na utulivu uliokuwa umeanzakuonekana nchini humo na hapa anaeleza athari zaidi ya matamshi ya Mursi.

Hatua ya spika wa bunge Saad el-Katatni kutaka kikao cha dharura kifanyike imekuja punde tu baada ya Mursi kutoa agizo la kufunguliwa tena kwa bunge baada ya mahakama kulifutilia mbali mwezi uliopita.

Kwa sasa ni watu wengi tu waliokwenda Mahakamani kutaka kujua iwapo Rais Mursi alikuwa na uwezo kisheria kuagiza bunge kufunguliwa tena licha ya mahakama kuu kulifutilia mbali.

Hata hivyo mahakama hiyo imesema itashughulikia kesi hizo baadaye huku ikisema kwamba haina uanachama na chama cocote cha kisiasa nchini humo na kwamba kazi yake ni kulinda maandishi ya katiba ya nchi.

Rais Mursi anayetoka chama cha Udugu wa Kiislamu ambacho kimekuwa katika hali ya kutoelewana na jeshi, pia alisisitiza uchaguzi wa bunge kufanyika katika siku 60 zijazo ili kuweza kupata katiba mpya ya nchi hiyo inayotarajiwa kuundwa mwishoni mwa mwaka huu.

Rais wa Marekani Barack Obama

Rais wa Marekani Barack Obama

Shirika la habari la AFP limesema rais wa Marekani Barack Obama anatarajiwa kukutana na Mursi katika mkutano wa Umoja wa Mataifa jijini New York mwezi wa Septemba.

Licha ya kuwa Mursi anatoka katika chama chenye kufuata siasa za Kiislamu, kuhibitishwa kwake kama rais kulileta hali ya utulivu katika utawala wa Obama baada ya kuwa na hofu kwamba jeshi lililoongoza nchi lisingekubali ushindi wa Mursi hatua iliyozua wasi wasi wa kuwa na vurugu nchini humo.

Mwandishi Amina Abubakar/AFPE/AFP

Mhariri: Mohammed Khelef

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com