1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Kura zaendelea kuhesabiwa Kenya

Matokeo ya uchaguzi mkuu uliofanyika jana nchini Kenya yanaendelea kutolewa huku Uhuru Kenyatta akiongoza kwa takriban ailimia 55 dhidi ya mpinzani wake Raila Odinga akiwa na asilimia 40

Uchaguzi Kenya

Uchaguzi Kenya

Matokeo hayo yanayopokewa katika kituo cha kukusanyia matokeo cha Bomas mjini Nairobi yanamuonesha mgombea urais wa chama cha The National Alliance Uhuru Kenyatta akiongoza kwa kura millioni 1,507,854 dhidi ya mpinzani wake Raila Odinga wa chama cha Orange Democratic Movement aliye na kura 1, 148, 836 ya jumla ya kura zote zilizohesabiwa kufikia sasa.

Chama cha ODM tayari kimeelezea wasiwasi wake kwamba matokeo hayo si sahihi na kutilia shaka mfumo mzima wa uwasilishaji matokeo hayo.

Mmoja wa wagombea wa urais Uhuru Kenyatta

Mmoja wa wagombea wa urais Uhuru Kenyatta

Akizungumza na waandishi habari, Mkurugenzi wa uchaguzi katika chama cha ODM Franklin Bett amesema matokeo yalianza kutangazwa huku shughuli ya kupiga kura ikiwa bado inaendelea jambo ambalo halijawahi kufanyika mahali popote ulimwenguni.

Bett amesema huo ni ukiukaji wa kanuni za uchaguzi na kwamba kufanya hivyo ni sawa na kuwashawishi wapigaji ambao hawakuwa wamepiga kura kufanya uamuzi tofauti.

Pia chama cha ODM kimelelamika kwamba kukwama kwa mitambo ya electroniki ya kutambua wapiga kura ni jambo jingine la kutiliwa shaka.

Raila Odinga na mkewe baada ya kupiga kura jana

Raila Odinga na mkewe baada ya kupiga kura jana

“Shughuli hiyo ilikumbwa na kasoro kuanzia awali wakati wa kupiga kura kuanzia asubuhi ambapo mitambo ya kuwatambua wapiga kura ilikwama na maafisa wa tume ya uchaguzi kulazimika kutumia daftari au sajili za wapiga kura badala ya mitambo ya electroniki. Sajili hiyo inaweza kuaminika vipi? Na huo ndio wasiwasi wetu.” Alisema Franklin Bett

Mkurugenzi huyo wa uchaguzi katika chama cha ODM, amesema kumekuwa na visa vya watu kupiga kura zaidi ya mara moja katika vituo kadhaa ambapo tume ya uchaguzi yenyewe awali ilikiri hayo na kwamba hilo pia ni jambo la kutiliwa shaka juu ya uhalali wa matokeo ambayo yamewasilishwa kufikia sasa.

Kamishna wa IEBC Issack Hassan na Naibu wake James Oswago

Kamishna wa IEBC Issack Hassan na Naibu wake James Oswago

Kwa upande wake tume ya IEBC hata hiyo imesisitiza kwamba matokeo yanayowasilishwa ni ya muda na hayawezi kuchukuliwa kuwa matokeo ya mwisho hadi maafisa wa uchaguzi watakapowasilisha stakabadhi zilizotiwa sahihi na waakilishi wa wagombea walioshiriki kwenye uchaguzi.

Kwenye taarifa yake ya mwisho, Mwenyekiti wa tume huru ya uchaguzi na mipaka Isaack Hassan alisema haya ni matokeo au takwimu za muda na wakenya wanapaswa kusubiri matokeo rasmi kutangazwa na tume ya uchaguzi punde tu maafisa wote wanaosimamia uchaguzi watakapowasilisha matokeo yao rasmi na hapo ndipo tume yake itakapotangaza mshindi na endapo hakutakuwa na mshindi tume itatangaza duru ya pili ya uchaguzi.

Matokeo yote ya uchaguzi nchini Kenya yanapokelewa hapa katika ukumbi wa Bomas moja kwa moja kutoka vituo vya kusehesabia kura katika majimbo mbali mbali kote nchini.

Mwandishi Alfred Kiti

Mhariri Amina Abubakar

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com