DW yavuma kila mahali

Matangazo kusikika, mote mote yaenea
Mpaka na kwetu Afrika, kweli yametufikia
Kiangazi na masika, hatamu kushikilia

Makini na si papara, matangazoye adhimu
Husikika kwa ubora, huachilia utamu
Kwa sauti barabara, zisizo mang’amung’amu

Hutuletea habari, huru zilizo murua
Huongeza umahiri, vipindi kusisimua
Kwa weledi na fahari, maarifa kufunua

Kisima cha maarifa, sifa umejizolea
Sehemu zenye maafa, hujasita elezea
Bila kuogopa kufa, hivyo kutopendelea

Habari zenye mantiki, siasa hata jamii
Zilizo na uhakiki, pasipo na usanii
Ukweli na penye haki, kwa mabaya husifii

Vipindi vyenye kufana, elimu na burudani
Vyawezesha kupambana, na maisha mtaani
Huwaokoa vijana, mbinu tia maanani

Mazingira kukazia, kuelimisha kwa kina
Wanyonge kuwalilia, kwa maisha kutofana
Shamba kutopalilia, kwa mvua kukosekana

Kiswahili kukikuza, sifa iliyotukuka
Kigezo cha kuongoza, ni kweli sio mashaka
Wengi wamesikiliza, na hivyo kuelimika

Hapa mwisho wa kunena, endeleza mapambano
Upate pia heshima, kuhimili mashindano
Usichoke na kukoma, ulete maelewano
Hongera kwa matangazo, yarindimayo hewani

Tanbihi: Shairi hili limeandikwa na msikilizaji Jpseph Mwaka kwa ajili ya maadhimisho ya miaka 50 ya DW.

Mhariri: Mohammed Khelef