Xi Jinping: Kandidati i kompromisit

"Who is Hu?" pyeti media ndërkombëtare saktësisht dhjetë vjet më parë, kur brezi udhëheqës tani në largim, rreth Hu Jintao-s, mori pushtetin në Kinë: "Kush është Hu-ja?". Këtu nuk kishte vetëm kënaqësi për lojën e fjalëve të anglishtes, po edhe hutim të vërtetë. Përveç biografisë së tij zyrtare në parti për kreun e ri të shtetit gati nuk dihej gjë (një fakt, i cili nuk ka ndryshuar thelbësisht as pas dhjetë vjetësh në detyrë).

Tani bëhet e njëjta pyetje për pasardhësin e tij Xi Jinping. Mirëpo këtë herë shumë kinezë kanë përgjigje: Xi-ja, po ky është burri i Peng Liyuan-it. Peng-u, me të cilën Xi-ja është i martuar për herë të dytë, gëzon popullaritet të madh në Kinë si këngëtare hitesh. Këngët e saj patriotike me tituj si "Atdheu im", apo "Përpara Kinë", e bëjnë atë si bashkëshorte funksionari krejtësisht të pranueshme. Megjithatë në radhët e elitës partiake kineze të mbyllur lidhja e spikatur e bën Xi-në paksa të bjerë në sy.

"Princ" ambicioz

Pa marrë parasysh martesën e tij Xi-ja nuk njihet si njeri me shumë çelësa. Një kabllogram i Ambasadës Amerikane, i cili u publikua prej Wikileaks-it, e përshkruan atë si "ambicioz", "elitar" dhe "pragmatik". Xi-ja lindi më 1953 si djalë i një heroi të revolucionit dhe u rrit gjatë viteve të para në rrethin e elitës komuniste. Prandaj, në versionin e vëzhguesve të Partisë Komuniste, ai bën pjesë në fraksionin e të ashtuquajturve "princër", fëmijëve të kuadrove të lartë të partisë. Mirëpo i ati u bë që në fillim të viteve gjashtëdhjetë pre e spastrimeve brenda partisë, kaloi disa vite në burg dhe u rehabilitua vetëm pas vdekjes së Maos. Nën Deng Xiaoping-in i ati i Xi-së ishte për kohë të shkurtër guvernator province në Guangdong (provinca, e cila konsiderohej si laborator provash për reformat ekonomike).

Nga provinca nëpërmjet Shangait në Pekin

Si miliona të rinj të tjerë Xi Jinping-u u dërgua gjatë revolucionit kulturor në provincë dhe jetoi për disa vite në një fshat të largët të provincës Shaanxi. Kur u kthye në Kinë iu fut me këmbëngulje politikës dhe u bë anëtar i Partisë Komuniste (kjo, pa dalë i ati ende nga burgu). Ai bëri karrierë fillimisht në ushtri dhe si asistent i ministrit të Mbrojtjes Geng Biao arriti në qarqet më të larta të pushtetit në Pekin. Më vonë u bë sekretar partie dhe guvernator i provincave bregdetare Zhejiang dhe Fujian. Atje fitoi namin e politikanit, që i dëgjon hallet e ekonomisë private. Kjo e fundit vuan në Kinë nën dominimin e koncerneve shtetërore. Në 2006-n, pasi u hoq kryetari i partisë në Shangai Chen Liangyu për shkak të një skandali korrupsioni, Xi-ja u bë si sekretar partie, figura më e rëndësishme e metropolit ekonomik. Vitin pasues, në 2007-n, Xi Jinping-u u bë anëtar në rrethin më të ngushtë të pushtetit: komitetin e përhershëm nëntëanëtarësh të Byrosë Politike. Pastaj, në 2008-n, Xi-ja u bë zëvendësprsident.