Vendet e Ballkanit Perëndimor angazhime për sigurinë e lëvizjes pa viza
6 Nëntor 2012Pas kritikave që vijnë nga disa shtete anëtare të BE-së për abuzime me udhëtimin pa viza nëpër hapësirën Shengen nga ana e qytetarëve të Ballkanit Perëndimor, zyrtarët nga rajoni u angazhuan për më shumë bashkëveprim në përmirësimin e situatës. Gjatë punimeve të Forumit dyditor Ministerial BE - Ballkani Perëndimor, që përfundoi të martën (06.11.) në mesditë në Tiranë, veç ministrave të brendshëm dhe të drejtësisë nga vendet e rajonit ishte e pranishme dhe Komisionerja e BE-së për Çështjet e Brendshme, Cecilia Malmström.
Në një kohë kur është hedhur ideja se Parlamenti Europian, përballë rritjes së fluksit të kërkesave për azil nga qytetarët e vendeve të rajonit, pritet që të diskutojë mbi mundësinë e miratimit të së ashtuquajturës “klauzolë për pezullimin e lëvizjes së lirë në zonën Shengen”, nga autoritetet e vendeve ballkanike pati një reagim të përbashkët në favor të sigurisë për lëvizjen e lirë.
Në bazë të një deklarate që u miratua nga ministrat e brendshëm dhe të drejtësisë të Ballkanit Perëndimor shprehej angazhimi se ato do të rrisin bashkëpunimin e mëtejshëm operacional dhe shkëmbimin e informacionit me autoritetet përkatëse të vendeve anëtare të BE-së, të Komisionit Europian, dhe sipas nevojës edhe me FRONTEX dhe EUROPOL në fushën e menaxhimit të kufirit, migrimit të parregullt, azilit dhe ripranimit në përputhje me legjislacionin.
Sipas deklaratës që u miratua në punimet e Forumit të Tiranës, pritet që të fillojnë hetime efektive ndaj personave apo grupimeve që stimulojnë migrimin e parregullt, si dhe do ndiqen penalisht ata që mundësojnë abuzimin e regjimit pa viza, ndërkohë që autoritetet e vendeve të rajonit në përputhje të plotë me të drejtat themelore të qytetarëve do të forcojnë kontrollet kufitare.
Vendet e rajonit do të intensifikojnë dhe fushatat ndërgjegjësuese për informimin e mëtejshëm të qytetarëve mbi të drejtat, por dhe përgjegjësitë në rastet e abuzimeve në lëvizjen pa viza në zonën Schengen të BE-së etj.
Ministeriali BE - Ballkani Perëndimor diskutoi dhe mbi rrugët e kooperimit rajonal për të rritur përpjekjet në luftën kundër trafikimit të paligjshëm dhe mbledhjes së armëve të zjarrit, pjesëve të tyre dhe komponentëve kryesore dhe municioneve.
Komisionerja e BE-së për Çështjet e Brendshme znj. Cecilia Malmström u shpreh se agjencitë e zbatimit të ligjit duhen forcuar në vendet e rajonit.
“Kapacitet e tyre duhen forcuar për një luftë më efikase kundër krimit të organizuar, korrupsionit dhe krimit transanacional, duke përfshirë këtu edhe hetimet financiare. Përpjekje duhen bërë për konfiskimin e aseteve kriminale. Korrupsioni është mjaft i përhapur dhe mbetet shqetësues. Ai pengon hetimin dhe luftën ndaj krimit të organizuar dhe lejon infiltrimin e grupeve kriminale në sektorin publik dhe privat. Të ketë dënime më të ashpra kundër krimit të organizuar dhe korrupsionit.”