Bundeswehr Auslandseinsätze

Pak javë para Konferencës së Bonit për Afganistanin nuk ka shenja, që tregojnë se kur do të tërhiqen ushtarët e parë gjermanë nga Afganistani. "Një reduktim i tepërt i kontigjentit në shenjë të simbolikës politike ndalohet njëjtë sikur braktisja e parakohshme e aftësive të rëndësishme," tha ministri gjerman i Mbrojtjes, Thomas de Maiziere (CDU) të martën (25.10.) në konferencën prestigjioze të sigurisë të organizuar nga "Handelsblatt" në Berlin. Sipas parashikimit të tij Bundeswehri në Afganistan do të jetë i pranishëm edhe pas vitit  2014, megjithëse jo me trupa luftarake.

Një tërheqje e ngadalshme

Mandati i tanishëm, i cili parashikon stacionimin e më së shumti 5350 ushtarëve të Bundeswehr-it në Afganistan, pothuajse është shfrytëzuar në maksimum. Në bisedimet e ardhshme për zgjatjen e mandatit, që do të zhvillohen në shkurt të vitit 2012, do të rinegociohet për kufirin maksimal. Edhe pse trajnimi i forcave afgane të sigurisë po shkon sipas planit, de Maizière nuk e ka ndërmend që deri në fund të këtij viti të fillojë me reduktimin e trupave. "Ne nuk guxojmë të rrezikojmë kalimin e përgjegjësive dhe sigurinë e ushtarëve tanë", thotë ai.  Për dallim ministri i Jashtëm Guido Westerwelle (FDP) ka kohë që angazhohet që tërheqja të fillojë gjatë këtij viti.

Eksperti socialdemokrat (SPD) për politikën e jashtme, Gernot Erler, kritikoi deklaratat e ministrit të Mbrojtjes. Sipas tij tërheqja e 500 nga 5000 ushtarët, sa aktualisht janë në Afganistan, është e mundur të bëhet gjatë këtij viti. Gjithashtu edhe SHBA do të fillojë qysh në vitin 2011 me tërheqjen e trupave të saj nga Afganistani, sqaron Erler dhe paralelisht me ata edhe Bundeswehri duhet të zvogëlojë kontigjentin e saj.

Standarde të reja për misionet jashtë shtetit

Misionet jashtë vendit  në të ardhmen do të jenë ndër detyrat më të rëndësishme të Bundeswehr-it, por do të caktohen standarde më të forta. "Ne ndërhyjmë aktualisht për çështje politike, të cilat nuk janë detyra thelbësore të Bundeswehr-it", tha Thomas de Maizière. Në misionet e ardhshme Bundeswehr-i nuk do të heqë barrikadat e rrugëve në Kosovë, apo të hapë puse uji në Afganistan. Nëpërmjet detyrave të tilla krijohet një imazh i shtrembëruar për forcat e armatosura: "Ju mund të hapni shumë mirë puse uji, por ne jemi shumë të befasuar, që ju duhet të luftoni." Ky është një kthim mbrapsht i marrëdhënieve,  tha ministri gjerman i Mbrojtjes.

Në të ardhmen, ministritë e tjera duhet të marrin përsipër më shumë përgjegjësi, kërkoi de Maizière. Edhe pse është e pamundur të bëhet dallimi strikt në mes të misionit humanitar dhe luftarak. Megjithatë koncepti i provuar i rrjetit të sigurisë në Afganistan nuk do të thotë që pjesa më e madhe e detyrave të shkarkohet tek Bundeswehri.  

Autor: Nina Werkhäuser/Esat Ahmeti

Redaktoi: Angjelina Verbica