Testi kryesor: pranimi i rezultatit nga pala humbëse

Faza e parë e zgjedhjeve të djeshme lokale, ajo e votimit, u karakterizua nga pjesëmarrja e konsiderueshme e zgjedhësve dhe normaliteti, cilësi këto që nuk i errësuan disa incidente sporadike. Testi kryesor, që do ta ndajë Shqipërinë nga historia e deritanishme e zgjedhjeve të kontestuara dhe do të dëshmojë për ecurinë e saj demokratike, pritet të jetë pranimi i rezultatit nga pala humbëse, mesazh ky i dhënë palëve nga BE dhe faktori ndërkombëtar.

Me një pjesëmarrje prej 50,9 % të votuesve në mbarë vendin është mbyllur mbrëmë procesi i votimit për zgjedhjet lokale. Kryeministri Berisha e vlerësoi këtë proces "dinjitoz, të drejtë dhe të ndershëm" dhe garantoi zbatimin e ligjit në procesin e numërimit. “Ligji shqiptar i numërimt të votave dhe përdorim i teknologjisë më të përparuar, të instaluar në çdo qëndër votimi, jep shansin për numërimin më të saktë të deritanishëm", tha Beris

Vlerësim dhe kritika ndaj procesit të votimit

Por procesi i votimit është perceptuar pothuaj në mënyra të kundërta nga Lulzim Basha dhe Edi Rama, dy kandidatët rivalë për të kryesuar bashkinë e Tiranës, më të rëndësishmen dhe më të madhen në Shqipëri.

Kandidati i koalicionit qeverisës” Aleanca për qytetarin”, Lulzim Basha, në një deklaratë në orët e para të mëngjesit të sotëm e vlerësoi procesin e votimit, "për atmosferën e qetë të respektit reciprok dhe të qytetarisë”.

Edhe Edi Rama, rivali i tij, lideri i opozitës dhe kandidat i koalicionit opozitar, “Aleanca për të ardhmen", që kandidoi dje për mandatin e tij të katërt në krye të bashkisë së kryeqytetit, në një deklaratë në orët e para të mëngjesit të sotëm e vlerësoi procesin e djeshëm të votimit si më të mirin e deritanishëm në ekran, por të dëmtuar, sipas tij, nga dhuna e qeverisë. “Këto ishin zgjedhjet më të mira në ekran, por më të shëmtuarat në realitetin e njerëzve të zakonshëm. Ndaj tyre është ushtruar presion, kërcënime dhe janë bërë përpjekje për të ushtruar të gjithë trysninë e shtetit. Procesi i deritanishëm zgjedhor ka ofruar shembuj spektakolarë të mospërputhjes me standartet ndërkombëtare”, tha në orët e para të ditës së sotme Edi Rama..

Pranimi i rezultatit, një tregues thelbësor i standarteve ndërkombëtare

Mospranimi i rezultatit nga pala humbëse dhe kontestimi i tij ka karakterizuar pothuajse të gjitha proceset zgjedhore në Shqipërinë post-komuniste. Prandaj ndryshimi i kësaj tradite dhe hapja e një faqeje të re, ku pala humbëse të pranojë rezultatin, përbën, në rsatin e Shqipërisë, një nga standartet kryesore ndërkombëtare dhe njëherazi testin për progres demokratik. Mesazhin e vendosmërisë për të realizuar këtë kthesë të shumëpritur e dha i pari kryeministri Berisha.

“Partia Demokratike,” koalicioni politik i drejtuar prej saj “Aleanca për qytetarin”është e vendosur të pranojë çdo rezultat. I bëj thirrje edhe kundërshtarit të shkëputet një herë dhe përgjithmonë nga praktika e deritanishme e mospranimit dhe të vendosë të njohë çdo rezultat të këtyre zgjedhjeve”, tha kryeministri Berisha, duke iu drejtuar liderit të opozitës Edi Rama.

E njëjta praktikë e deklarimit të fitores para daljes së rezultatit

Numërimi i votave në 66 qëndrat e votimit në mbarë Shqipërinë po ecën ngadale. Sa për ilustrim: nga 485 kuti votimi gjithsej në Tiranë deri tani janë numëruar vetëm 10 syresh. Ndërkohë që faza e dytë e procesit zgjedhor, ajo e numërimit, po vazhdon, është shfaqur përsëri praktika e deklarimit të fitores se zgjedhjeve në Tiranë, pa pritur përfundimin e kësaj faze. Lideri i opozitës dhe kandidati për bashkinë e Tiranës , Rama, tha sot në orët e para të mëngjesit: “Fitorja në Tiranë është e qartë. Mbetet për t'u parë thellësia e saj”.

Kurse Lulzim Basha, kandidat i koalicionit qeverisës për kryetar bashkie në kryeqytet, deklaroi se ishte optimist për fitoren në Tiranë, por u tregua i përmbajtur: “Kam të gjitha arsyet të ndihem jashtëzakonisht i inkurajuar nga të dhënat paraprake, nga sondazhet, nga pjesëmarrja e jashtëzakonshme, por jam i vendosur të pres numërimin e votës së fundit dhe të shpalljes së rezultatit”, tha Z. Basha.

Pranim i rezultatit do të jetë testi kryesor për BE që këto zgjedhje të cilësohen të lira, të ndershme dhe në përputhje me standartet ndërkombëtare, gjë që do jetë një tregues i qartë i progresit demokratik të Shqipërisë.

Procesi i djeshëm zgjedhor u karakterizua nga normaliteti duke lënë pas incidentet e dhunës dhe të tensionit politik, të shfaqura gjatë fushatës elektorale. Drejtori i OSBE /ODIHR-it, Janez Lenarçiç, që dje vëzhgoi nga afër procesin zgjedhor në Tiranë, e cilësoi atë "vendimtar për të ardhmen europiane të Shqipërisë". Kjo pasi kalimi i testit, që paraqesin këto zgjedhje, përbën një shans më shumë për Shqipërinë, që BE të mos refuzojë si vitin e kaluar aplikimin e saj për statusin e vendit kandidat për anëtarësim.

Autor: Ani Ruci

Redaktoi: Angjelina Verbica