Sulm vdekjeprurës ndaj ushtarëve gjermanë
29 Maj 2011
Në provincën veriore afgane Taharu u krye dje një atentat vetëvrasës gjatë një takimi për sigurinë të autoriteteve, ushtrisë afgane dhe trupave të NATO-s. Disa vetë humbën jetën, ndër ta dy ushtarë të Bundeswehr-it (ushtrisë gjermane), siç bëri të ditur ministri i Mbrojtjes Thomas de Maizière (CDU).
Gjatë takimit në zyrën e guvernatorit të provincës Tahar ishte i pranishëm edhe komandanti i ISAF-it në veriun e Afganistanit, gjenerali gjerman Markus Kneip. Ky i mbijetoi sulmit, por sipas Bundeswehr-it, u plagos lehtë. "Siç paraqitet gjendja tani, Kneip nuk është e nevojshme të transportohet në Gjermani", tha drejtuesi i komandës së misionit të Bundeswehr-it Rainer Glatz.
Në shënjestër zyrtarë të lartë
Autoritetet afgane raportuan fillimisht për tre ushtarë gjermanë të vrarë. Gjithsej janë vrarë shtatë persona, tha zëdhënësi i guvernatorit, Fais Mohammad Tawhidi. Ndër ta gjendet edhe komandanti i policisë për veriun e Afganistanit, Daud Daud, dhe shefi i policisë së Taharit, Shah Xhahan Nuri. Guvernatori Abdul Xhabar Taqwa ishte njëri prej të plagosurve.
Atentati ndodhi në kompleksin e zyrave të guvernatorit të qytetit Talokan në veri të Afganistanit. Një bashkëpunëtor i guvernatorit të provincës, Kutbuddin Kamal, tha, se sulmi ishte kryer pas takimit. "Në fund të takimit, kur të gjithë po largoheshim, një atentator vetëvrasës po priste në korridor dhe hodhi veten në erë." Autorësinë e mori përsipër organizata radikale islamike Taliban.
Më shumë se 50 ushtarë gjermanë të vrarë
Kancelarja gjermane Angela Merkel (CDU) u shpreh "e shokuar dhe e pikëlluar" për sulmin. Gjatë vizitës së tij në shtetin e Gjirit Pesik, Oman, ministri i Jashtëm gjerman Guido Westerwelle (FDP) e dënoi veprën. "Jam i prekur thellë prej këtij akti terrori barbar. Mbajmë zi për të vrarët dhe jemi të shqetësuar për të plagosurit." Presidenti afgan Hamid Karzai bëri fjalë për një "akt terrori barbar".
Para dhjetë ditësh në Talokan pati protesta pjesërisht të dhunshme para një kampi të ushtrisë gjermane. Gjatë tyre u vranë dymbëdhjetë vetë. Që prej fillimit të misionit të Bundeswehr-it në Afganistan janë vrarë më shumë se pesëdhjetë ushtarë gjermanë. Së fundi një ushtar gjerman u vra të mërkurën gjatë një sulmi ndaj një patrulle. Për të u mbajt të shtunën në kampin ushtarak të Kundusit në veri të Afganistanit një ceremoni mortore.
Autor: Dirk Eckert / Elert Ajazaj
Redaktoi: Bahri Cani