Strehimi i refugjatëve në Gjermani
Rreth 300.000 refugjatë parashikonte për vitin 2015 Zyra Federale për Migracionin, ndërkohë numri i tyre ka arritur në 450.000 azilkërkues. Një vështrim në mjediset ku strehohen refugjatët në Gjermani.
Fillimisht tre muaj në kampet e pritjes
Në kampin e pritjes së azilkërkuesve në Trier të landit Rhein-Pflaz, mund të strehohen rreth 850 vetë. Kur refugjatët vijnë në Gjermani ata fillimisht i akomodojnë në të tilla kampe pritjeje, ku ata banojnë deri në tre muaj. Pas kësaj periudhe refugjatët i dërgojnë në ndonjë qytet apo komunë, ku kushtet e strehimit janë të ndryshme në varësi të vendit.
Kamp emergjence në sallën e aktiviteteve të qytetit
Meqënëse kampet e pritjes për azilkërkues tani janë të tejmbushura, duhet të shfrytëzohen edhe ndërtesa të tjera për emergjencë. Në Ham të Renanisë Veriore - Vestfalisë, salla e eventeve të qytetit është kthyer në kamp për strehimin e 500 refugjatëve. Sipërfaqja e sallës prej 2.700 metrash katrorë përmes paneleve është ndarë në "dhoma" provizore dhe në secilën prej tyre janë vendosur 14 shtretër.
Strehim nëpër klasa
Vala masive e refugjatëve po i mbingarkon qytetet duke tejkaluar kapacitet ekzistuese të pranimit. Qytetit të Aachenit iu desh që në mes të korrikut brenda një kohe të shkurtër të pranonte 300 refugjatë. Mundësia e vetme ishte që të gjithë ata të strehoheshin në gjimnazin Inda. Ndihmësit e shërbimit humanitar Johanniter vendosin atje shtretër dhe përgatisin mjedisin për pritjen e refugjatëve.
Kampe provizore me çadra
Së fundi në Gjermani po ndërtohen gjithnjë e më shumë kampe provizore me çadra. Edhe në Halberstadt në Saksoni-Anhalt është rritur ndjeshëm numri i azilkërkuesve dhe si rrjedhojë janë tejkaluar kapacitetet, kësisoj është hapur një kamp provizor me çadra. Tani në verë mmund të përdoren kampet e tilla provizore, por deri në dimër, duhet të jenë të tjera mejdise në dispozicion.
Kamp me çadra në Dresden
Një ndër kampet më të mëdha me çadra për refugjtët është vendosur ndërkohë në Dresden, Saksoni. Që të jetosh atje kërkohet shumë durim. Para tualeteve ambulante krijohen radhë të gjata, edhe për ushqimin duhet pritur në radhë. Këtu jetojnë aktualisht rreth 1000 vetë nga 15 kombe të ndryshme. Ditët e ardhëshme do të pranohen edhe të tjerë - derisa të jetë ezauruar kapaciteti për 1100 vetë.
Jeta në kontejerë banimi
Për të rritur kapacitet e pranimit, në shumë vende në Gjermani gjithnjë e më shumë po vendosen kontejerë banimi për refugjatët. Në kampin e pranimit në Trier këto kontejerë për strehim emergjence janë vendosur qysh në vitin 2014. Aktualisht në këtë kamp ndodhen mbi njëmijë refugjatë.
Sulme ndaj vendstrehimeve të refugjatëve
Zjarrëfikësi duke shuar më 18 korrik zjarrin në një objekt të planifikuar për strehimin e refugjatëve në Remchingen, në Baden-Vyrtemberg. Qendrimi refuzues i disa qytetarëve ndaj azilkërkuesve kthehet në ksenofobi të shoqëruar edhe me dhunë ndaj të huajve. Pothuajse çdo ditë ka sulme ndaj vendstrehimeve të refugjatëve - kryesisht në lindje dhe në jug të Gjermanisë.
Politika e preokupuar
Kryetari i partisë socialdemokrate dhe zëvendëskancelari Sigmar Gabriel më 31 korrik duke folur me fëmijët e refugjatëve në Volgast, Mecklenburg-Pomerani, ku janë strehuar rreth 300 refugjatë. Politikani bëri thirrje që shteti të angazhohet për t'i lehtësuar qytetet dhe komunat. Megjithatë pranimi i refugjatëve është çështje parashë. "Kjo është një çështje e mirësjelljes", tha Gabriel.
Ndërtime të reja për azilkërkuesit
Për t'i strehuar në kushte më të përshtatshme azilkërkuesit, në shumë komuna po ndërtohen vendstrehime të reja - si këtu në Eckental pranë Nyrnbergut në Bavari. Kompleksi i shtëpive seri do të ndërtohet për rreth 60 vetë. Refugjatët e parë do të vendosen këtu në vitin 2016.
Qendra të tjera provizore
Derisa të kenë përfunduar ndërtimet e reja për refugjatët, do të duhet të krijohen qendra të mëtejshme emergjence. Si p.sh. këtu në parkun industrial Euro në Mynih. Brenda natës rreth 170 punonjës të organizatave të ndihmës dhe të zjarrëfikësit kanë krijuar një qytet me një duzinë çadra dhe me 300 shtretër.