Rajoy i përgatiti shpirtërisht spanjollët për një vit të të ri të vështirë
31 Dhjetor 2012Në konferencën e shtypit të fundit për këtë vit kryeministri i Spanjës Mariano Rajoy deklaroi: "Ne aktualishtnuk mendojmë, t’i kërkojmë Bankës Qendrore Evropiane (BQE), që ajo të ndërhyjë. Por nuk mund ta përjashtojmë një gjë të tillë për të ardhmen.“ Me këto fjalë kryeministri konservator Rajoy, ka nxitur spekulimet, se vendi i tij mund të kërkojë mbrojtje nën ombrellën e ndihmave financiare të BE-së. Por sidoqoftë për këtë spankollët duhet të përmbushin kushte të rrepta, të cilat deri tani ata i kanë kundërshtuar.
Spanja rikuperon buxhetin
Qëkurse presidenti i BQE-së,Mario Draghi, ka deklaruar, se BQE do të ndërhyjë në favor të vendeve të zhytura në borxhe dhe do të blejë në masë të pakufizuar obligacionet shtetërore, tregjet janë qetësuar disi. Interesat për vendet e krizës si Spanja dhe Italia u ulën paksa. Për sistemin e vet të rënuar bankar Spanja i kërkoi ndihma BE-së, por tani iberikasit ngurrojnë të kërkojnë ndihma të mëtejshme, sepse duan të kufizojnë influencën e troikës (Komisioni i BE-së, BQE dhe FMN) ndaj politikës së tyre buxhetore.
Gjendja do të përkeqësohet edhe më shumë
Spanja vuan nga recesioni, papunësia në mbarë vendin është rritur në 25%, që pas fundit të diktaturës së Frankos nuk ka pasur ndonjëherë kaq shumë të papunë në Spanjë. Papunësia tek të rinjtë është dyfish më e lartë. Në gjysmën e parë të vitit gjendja do të jetë shumë e vështirë, vetëm në gjashtëmujorin e dytë mund të ketë një farë qetësimi të situatës, tha kryeministri spanjoll.
Rajoy në konferencën e shtypit (28.12.2012) e mbrojti kursin e tij të kursimeve. Pavarësisht recesionit ai ka luftuar, që të ulë borxhet e reja të vendit. Ai tha, se e di që programet e kursimeve kanë qenë të ashpra, por ai shtoi, se: „Pa reforma ne nuk do të mund të financonim sektorin e shëndetësisë dhe të arsimit.“