Shqipëria - struktura të reja për të luftuar korrupsionin në polici
22 Korrik 2008Rritja relative e pagave të ulta të policëve dhe përjashtimi nga policia e të korruptuarve e ka ulur vërtet numrin e rasteve të tilla, por nuk i ka zhdukur rastet e mitmarrjes korruptive.
Një projektligj, që pritet të bëhet së shpejti ligj në Parlament, synon të çojë në zero numrin e policëve të korruptuar. Qeveria e kryeministrit Berisha sapo ka miratuar projektligjin " Mbi fuqizimin dhe pavarësinë e Kontrollit te Brendshëm në Ministrinë e Brendshme."
Ai është fryt i përvojës së ekspertëve vendas të policisë dhe asistencës së ekspertëve europianë, përmes misionit të asistencës së policisë së Shqipërisë nga vendet e BE, i njohur me inicialet PAMECA dhe i kryesuar nga Gjermania.
Burime zyrtare nga kjo Ministri thanë për DW se projektligji parashikon fuqizimin e kësaj strukture ekzistuese duke i dhënë të drejtën e përgjimit, hetimit dhe arrestimit të punonjësve të policisë së shtetit, pavarësisht nga grada e tyre dhe pa vënë në dijeni paraprakisht Ministrin e Brendshëm.
Nenet e këtij projektligji i japin Kontrolit të Brendshëm të Ministrisë pavarësi ekonomike, pavarësi në zgjedhjen e personelit dhe në hetimet ndaj strukturave të policisë.
Në nenin përkatës lidhur me pavarësinë e kësaj strukture është theksuar se hap citimin : "Shërbimi i Kontrollit të Brendshëm nuk është i detyruar t’i japë informazione Ministrit të Brendshëm, lidhur me identifikimin e dëshmitarëve, bashkëpunëtorëve të drejtësisë apo informatorëve, apo lidhur me informacione për të cilat , organi i akuzës, ka urdhëruar me shkrim qe të konsultohen vetëm me persona të caktuar".
Duke përjashtuar aspektin operacional Ministri i Brendshëm mbetet personi përgjegjës per këtë strukturë. Ai emëron drejtuesit e saj që nga ana e tyre gëzojnë kopetencën e përzgjedhjes së punonjësve. Projektligji u jep atyre të drejtën e provokimit apo "të testit të integritetit" duke u ofruar para në formë ryshfeti, në rrugë apo gjatë ushtrimit të kopetencave, punonjësve te policise. Kushdo, që punon në Shërbimin e Kontrollit të Brendshëm ka të drejtën e përdorimit të identitetit dhe të dhënave të rreme, me dijeninë e Drejtorit të Përgjithshëm.
Projektligji i jep të drejtën këtij shërbimi të detyrojë cdo punonjës të policisë së shtetit t’i japë shpjegime për pasurinë e tij dhe burimet financiare të vënies së saj.
Shërbimi i Kntrollit të Brendshëm gëzon të drejtën t’ i kërkojë organit të akuzës që të marrë pjesë në veprime përgjuese dhe hetuese që parandalojnë dhe dokumentojnë akteve kriminale.
Projektligji pritet të vë në Parlament. Ai i k atë gjitha gjasat që të marrë votën pro të opozitës, e cila e konsideron te pamjaftueshme luftën e deritanishme të qeverisë Berisha për të zhdukur korrupsionin në radhët e policisë së shtetit.