Staatengemeinschaft Libyen Auswirkungen
21 Mars 2011Qysh në fillim ishte e qartë: Aksionet ushtarake kundër regjimit të Muamar Al-Gadafit janë me rrezik dhe shansi për të pasur sukses nuk është i sigurtë. Diktatori libian nuk tërhiqet, por i mobilizon përkrahësit e tij për luftë të armatosur kundër objektivave perëndimore. Trupat ndërkombëtare janë superiore ushtarakisht. Por ato nuk u kundërvihen regjimeve me trupat e këmbësorisë. Si dhe kur do të përfundojë kjo luftë asimetrike është e pasigurtë. Ndaj ne duhet të përgatitemi edhe për më të keqen: Kjo mund të jetë një luftë e gjatë. Mund të ketë shumë të vrarë.
Megjithatë bashkësia ndërkombëtare parimisht ka vepruar drejtë: Të mbajturit sehir, ndaj asaj se si një diktator mposht kryengritjen e qytetarëve në vendin e tij, do të ishte katastrofale. Bashkësia ndërkombëtare duhej të dëshmonte, se solidariteti i saj me lëvizjet për liri në botën arabe nuk është vetëm me fjalë. Ajo u konfrontua me dy opcione morale mjaft problematike dhe duhej të vendoste nën një presion të jashtëzakonshëm kohe.
Duhej më shumë prani e botës arabe në misionin kundër Gaddafit
Sidoqoftë është e rrezikshme, që SHBA, Franca dhe Britania e Madhe përkundër të gjitha përbetimeve nuk insistuan sa duhet për një prani më të dukshme të vendeve arabe. Liga Arabe kërkoi me mjaft insistim krijimin e një zone ndalim fluturimesh dhe tani emirati i vogël i Gjirit, Katari ka nisur pjesëmarrjen ushtarake, Por ajo që të bie në sy është fakti, se të gjitha fijet e rëndësishme të komandës po kalojnë në hemisferën perëndimore, ndërkohë që udhëheqësit e shteteve arabe deri tani kanë mundur të shmangen me sukses ndaj çdo përgjegjësie.
Këtu qëndron një rrezik i jashtëzakonshëm për legjitimitetin e kësaj ndërhyrjeje në të gjithë rajonin. Krahasuar me ndërhyrjet ushtarake në Irak dhe në Afganistan ndërhyrja në Libi vërtetë ka tani më shumë akceptancën e botës arabe: Shumë njerëz solidarizohen me rebelët dhe luftën e tyre kundër Al-Gadafit. Por kjo atmosferë shumë shpejt mund të ndryshojë, në qoftë se në YouTube apo në kanalet e mëdha televizive do të shfaqen gjithnjë e më shumë pamje me civilë të vrarë prej sulmeve të SHBA-së.
Liga Arabe ndërkohë ka shprehur kritikë ndaj qëndrimit perëndimor, por këtë e bën pa treguar alternativa. Kjo është një shenjë alarmuese: Indinjata, që po shprehin prej muajsh popujt arabë ndaj regjimeve të veta, shpejt mund të ndryshojë duke u kthyer në një qëndrim anti-perëndimor. Kjo do t' u vinte për mbarë sundimtarëve që ndodhen nën presion.
Autor: Rainer Sollich
Redaktoi: Lindita Arapi