Qeveria e re gjermane
Zgjati shumë, por tani ajo u formua, qeveria e re gjermane. Pas votës së SPD në mbështetje të koalicionit, kancelarja Merkel bëri të ditur emrat e kabinetit të ri qeveritar. Krahas fytyrave të njohura ka edhe surpriza.
Mandati i tretë i kancelares Merkel
Ajo që dihej që pas zgjedhjeve, tani është e sigurtë: Angela Merkel mbetet kancelare dhe do të drejtojë një Koalicion të Madh të CDU/CSU dhe SPD. Qeverisa e re do të përbëhet nga pesë ministra të CDU-së, tre ministra të CSU-së dhe gjashtë ministra të SPD-së. Merkeli e ka drejtuar njëherë një koalicion të madh, në vitet 2005-2009. Me disa ish-ministra të SPD-së ajo ritakohet në kabinetin qeveritar.
Superministri
Titullin "superministër" ia dha shtypi kryetarit të Partisë Socialdemokrate, SPD, Sigmar Gabriel. Ai do të përgjigjet në të ardhmen për sektorin e ekonomisë e të energjisë dhe kështu edhe për projektin prestigjoz të kthesës energjetike. Për këtë temë, u grindën disa herë ministri i Ambjentit i CDU-së dhe ministri i Ekonomisë i FDP-së. Si zëvendëskancelar, Gabrieli është njeriu i dytë në kabinet.
Kthim në Ministrinë e Jashtme
Roli i kryediplomatit duket se i përshtatet: Frank- Walter Steinmeier, së fundi kryetar i Grupit Parlamentar të SPD-së në Bundestagun Gjerman do të drejtojë në të ardhmen Ministrinë e Jashtme. Këtë post ai e mbajti që në kabinetin e parë të Merkelit, 2007 deri 2009 ishte edhe zëvendëskancelar. Në zgjedhjet e vitit 2009 ai ishte kandidati socialdemokrat për kancelar kundër Merkelit, por nuk fitoi.
Vazhdimësi në politikën financiare
Ministri i vjetër i Financave është edhe i riu: Wolfgang Schäuble (CDU) do të jetë edhe më tej përgjegjës për politikën financiare dhe do të luftojë në Bruksel për një euro stabile. Ai është 71 vjeç, më i moshuari, por njëkohësisht personi që ka qëndruar më gjatë në qeveri. Që më 1984 ai ishte shef i zyrës së kancelarit Helmut Kohl. Që prej një atentati më 1990 ai është ulok në karrige me rrota.
Strateg me përvojë
Njeriu i Merkelit për të gjitha situatat: Thomas de Maiziere konsiderohet si mbështetës besnik i kancelares dhe që mund ta angazhosh në shumë poste. Meqenëse së fundi iu desh të pranojë kritika të ashpra si ministër i Mbrojtjes, ai do të drejtojë në të ardhmen sërish ministrinë e Brendshme. Këtë pozicion, juristi e ka mbajtur njëherë në vitet 2009 deri 2011.
E para grua në krye të Bundeswehrit
Që Ursula von der Leyen do të ishte edhe më tej pjesë e kabinetit, kjo konsiderohej e sigurtë. Që ministrja e deritashme e Punës do të bëhej gruaja e parë në krye të ministrisë së Mbrojtjes, kjo erdhi papritur. Një detyrë e vështirë për nënën e shtatë fëmijëve. Reforma strukturore tek forcat e armatosura nuk ka përfunduar, së fundi ka pasur kritika për investime të gabuara.
Politikane e majtë e karrierës
Andrea Nahles do të bëhet Ministre e Punës dhe e Çështjeve Sociale. Sekretarja e përgjithshme e SPD-së konsiderohet se i përket krahut të majtë të SPD-së dhe si kritike e "Agjendës 2010", reformave të tregut të punës të Gerhard Schröderit. Ajo solli hare në Bundestag para pak kohësh, kur në një fjalim që mbajti për të kritikuar qeverinë citoi dhe këndoi në pultin e oratorit një këngë fëmijësh.
Surprizë në kabinet
Ai është një nga surprizat në kabinetin e ri: Heiko Maas do të drejtojë ministrinë e Drejtësisë, të zgjeruar edhe me mbrojtjen e konsumatorit. Juristi është thuajse i panjohur në politikën federale. Në vitet 2004 dhe 2009 ai kandidoi në zgjedhjet e Landit të Zarës si kandidat i SPD-së, por nuk fitoi ndaj kandidatit të CDU-së. Maas është që prej vitit 2001 në kryesinë e partisë socialdemokrate.
Fytyra e re e SPD-së
Që do ta merrte postin, kjo konsiderohet e sigurt: Manuela Schwesig, e preferuara e medieve dhe me moshën 39 vjeçare anëtarja më e re e kabinetit, do të jetë Ministrja e Families, të Moshuarve, Grave e Rinisë. Peer Steinbrücku e mori atë për këtë funksion në ekipin e tij të kompetencës. Deri tani, Schwesig ishte ministre për Punën, Barazinë e Çështjet Sociale në Landin e Mecklenburg- Vorpommerani.
Ministre nga radha e dytë
Si administratore e thesarit federal të SPD-së ajo deri tani punonte në prapavijë. Në të ardhmen, Barbara Hendricks do të jetë ministre e Ambjentit dhe si e tillë do të ndodhet në radhën e parë të politikës federale. Ndryshe nga deri tani, sektori i energjisë do të jetë në të ardhmen në kompetencat e superministrit Gabriel. Hendricks do të përgjigjet edhe për ndërtimin dhe zhvillimin e qyteteve.
Ushtar besnik i partisë
Prej menaxherit të fushatës elektorale të Merkelit në ministër të Shëndetësisë. Hermann Gröhe ishte deri tani sekretar i përgjithshëm i CDU-së dhe tani mund të korrë dafinat për fushatën e suksesshme elektorale: atë e shpërblejnë me një vend në kabinet. Si ekspert për çështje të shëndetësisë, politikani nga zona e Rinit deri tani nuk ka rënë në sy.
Dora e djathtë e Merkelit
Ministër në zyrën e kancelares dhe njëri nga bashkëpunëtorët më të ngushtë të kancelares do të jetë në të ardhmen Peter Altmeier. Ai ka qenë deri tani ministër i Ambjentit dhe është një i besuar i afërt i Merkelit. Si shef në zyrën e kancelares ai është përgjegjës edhe për koordinimin e shërbimeve të fshehta gjermane. Parardhësi i tij, Ronald Pofalla nuk bëri figurë të mirë në rastin e NSA-së.
Ministër që i pëlqen të sulmojë
Alexander Dobrindt-it (CSU) i pëlqen të tërheqë vëmendjen. Në postin e sekretarit të deritashëm të përgjithshëm i CSU-së ai e ka quajtur person "mbi peshë dhe me aftësi të kufizuara" kryetarin e SPD-së, Sigmar Gabriel. Tani, si ministër i Transportit dhe i infrastrukturës digjitale të Gjermanisë ai do të përgatisë për të ardhmen rrjetet e qarkullimit dhe ato sociale.
Profesoreshë në ministrinë e Arsimit
Vazhdimësi edhe në arsim: Johanna Wanka mbetet ministre e Arsimit dhe e Kërkimeve Shkencore. Politikania nga Brandenburgu e mori këtë post në shkurt 2013 nga Annete Schavan, së cilës iu desh të japë dorëheqjen pas kritikave se kishte kopjuar disertacionin. Para karrierës politike, matematikania ka qenë rektore e Shkollës së Lartë të Merseburgut.
Njeri i vijës së ashpër që i pëlqen debati
Me siguri që duhet parë si degradim: Hans-Peter Friedrich, deri tani ministër i Brendshëm, do të kujdeset në të ardhmen për Ushqimin dhe Bujqësinë. Në kuadër të aferës së përgjimeve të NSA-së, juristit iu desh të pranojë shumë kritika për menaxhimin që i bëri krizës. Si drejtues i dikasterit agrar, politikani i CSU-së spostohet pak nga vëmendja e publikut.
Fytyrë e re nga radhët e CSU-së
Gerd Müller do të drejtojë në të ardhmen ministrinë e Bashkëpunimit Ekonomik dhe Zhvillimit. Deri tani ai ka qenë sekretar shteti në ministrinë Agrare dhe ka qenë në kontakt me tema të politikave të zhvillimit. Për publikun ai megjithatë është një fytyrë e re në parketin politik.
Gjermanoveriore me rrënjë turke
Aydan Özoguz do të jetë si sekretare shteti për Migrimin, Refugjatët dhe Integrimin vërtet jo ministre federale, po megjithatë ajo ka një pozicion të spikatur brenda qeverisë. Hamburgasja 46 vjeçare është bijë migrantësh kurdë dhe që prej vitit 2009 deputete në Bundestag. Në vitin 2011 atë e zgjodhën zëvendëskryetare të SPD-së. Ajo e merr postin nga Maria Böhmer (CDU).
Politikane me përvojë në kulturë
Politikania e CDU-së, Monika Grütters do të jetë sekretarja e re e shtetit për Kulturën. Kompetencë e saj janë institucionet kulturore dhe projektet kulturore me rëndësi për Gjermaninë si dhe "përfaqësimi kulturor i gjithë shtetit". Historiania e artit Grütters besohet se kuptohet mirë me kancelaren Merkel. Paraardhësi i saj, Bernd Naumann nuk do të jetë më pjesë e kabinetit të ri.