Parlamenti pritet të votojë ligjin për dosjet e bashkëpunëtorëve të ish Sigurimit famëkeq të Shtetit
2 Korrik 2008Pas zvarritjeve dhe hezitimeve të njëpasnjëshme në vitet e fundit parlamenti në Shqipëri pritet që të diskutojë dhe votojë në seancë plenare një ligj të posaçëm për hapjen e dosjeve për ish bashkëpunëtorët e Sigurimit të Shtetit, arma më e ashpër e regjimit komunist deri në vitin 1990.
Deri më tani prej afër dy vjetësh në sekretarinë e parlamentit janë depozituar tre variante projektligjesh, një propozuar nga Partia Demokratike, një nga Partia Socialiste në opozitë dhe një nga grupi parlamentar i Partisë Demokristiane. Kryetarja e parlamentit paralajmeroi të mërkurën pasdite se nuk duhet të lejohen që të propozohen dhe emërohen në poste të rëndësishme njerëz që kanë bashkëpunuar me ish Sigurimin e Shtetit në kohën e diktaturës.
Nga kryesia e parlamentit është ngritur një grup deputësh, të cilët do të arrijnë të përafrojnë tre variantet e propozuara mbi projektligjin për hapjen e dosjeve të ish Sigurimit të Shtetit. Veç atyre që besojnë se këtë herë parlamenti në Tiranë me ligj të posaçëm do të miratojë hapjen e dosjeve të periudhës së diktaturës, nuk mungojnë dhe ata për të cilët kjo lëvizje përshkruhet si thjesht politike dhe demagogjike për të tërhequr vëmendjen e opinionit nga problemet social ekonomike me të cilat përballet vendi.