Kryeministri slloven Pahor i befasuar për mosratifikimin e protokolleve

Parlamenti i Sllovenisë e ndërpreu seancën pak para fillimit të debatit për ratifikimin e protokollit për anëtarësinë e Kroacisë dhe Shqipërisë në NATO. Shkaku ishte kundërshtimi i Partisë Demokratike Sllovene, të Janez Janshës, i cili kërkonte deklarimin lidhur me raportin financiar për vitin 2007. Jansha tha se partia e tij ka vendosur, që të ndërmarrë këtë hap për shkak se për herë të parë përbërja e re e parlamentit ka refuzaur ta miratojë raportin finaciar të qeverisë së kaluar. Jansha hodhi poshtë akuzat për mospjesëmarrje në punën e Komisionit Shtetëror për ratifikimin e protokollit për anëtarësimin e Kroacisë dhe Shqipërisë në NATO. Sipas tij kjo është një çështje, që ka të bëjë me sigurinë në Evropën Juglindore dhe me interesat e Sllovenisë.

Kryeministri i Sllovenisë Borut Pahor, ishte plotësisht i befasuar me sjelljen e partisë më të madhe opozitare, e cila konteston edhe politikën e Sllovenisë në raportet ndërkombëtare.

"Kjo prek besueshmërinë e Republikës së Shqipërisë dhe Republikës së Kroacisë ndaj shtetit tonë, sepse për anëtarësimin e tyre në NATO është i domosdoshëm ratifikimi."

Seanca e re e Parlamentit të Sllovenisë mund të mbahet vetëm pas dy javësh, por pa marrëveshjen Pahor-Jansha nuk mund të sigurohen dy të tretat e votave të deputetëve, sa janë të domosdoshme për ratifikimin e protokollit për anëtarësimin e Kroacisë dhe Shqipërisë në NATO. Në seancën e parlemtit slloven ishin edhe shumë gazetarë të huaj dhe përfaqësues të vendeve anëtare të NATO-s.