Kosova nuk do të bisedojë me Serbinë për sistemin juridik në veri, apo ndoshta edhe po?!

Përfaqësues të institucioneve të Kosovës, thonë se sistemi i drejtësisë dhe gjykatat në Kosovë janë çështje të brendshme. Qeveria disa herë e ka bërë të qartë se në të gjithë teritorin e vendit do të konsolidohet sundimi i ligjit, përfshirë këtu edhe veriun e Kosovës duke vënë në funksion gjykatat në atë pjesë. Kryesuesja e delegacionit të Kosovës në bisedime me Serbinë, Edita Tahiri, thotë për DW, se çështja e funksionalizimit të gjykatave në veri nuk do të jetë pjesë e bisedave Kosovë-Serbi.

“Porosia jonë për Serbinë është se ne po konsolidojmë sundimin e ligjit në të gjitha fushat dhe po japim një mesazh, se ajo çfarë ka ndodhë në periudhën e kaluar nuk mund të ndodhë më. Këtë çështje e kemi diskutuar edhe me EULEX-in. Ky mekanizëm evropian ka një rol që të ndihmojë institucionet e Kosovës për të vendosur ligjin veçmas në pjesën veriore të Kosovës”, thotë Edita Tahiri.

De Marnak: duhet arritur marrëveshje

Shefi i misionit EULEX, Xavier Bout de Marnak, më herët pati deklaruar se funksionaizimi i gjykatave në veri të Kosovës duhet të bëhet me një marrëveshje të nivelit të lartë politik, duke aluduar në një marrëveshje Kosovë-Serbi. Zëdhënësi i këtij misioni, Blerim Krasniqi, thotë për programin tonë se misioni EULEX do të donte që gjykatësit vendorë të kthehen sa më shpejtë që është e mundur në gjykatat në veri, sepse kjo do të jetë për të mirën e të gjitha komuniteteve që jetojnë në atë pjesë të Kosovës.

“EULEX-i ka bërë shumë përpjekje në arritjen e këtij qëllimi, mirëpo një zgjidhje afatgjatë do të arrihet vetëm përmes bashkëpunimit të ngushtë të të gjitha palëve të interesuara. Varet nga Prishtina dhe Beogradi, si dhe lehtësuesve të BE-së, të vendosin nëse kjo çështje do të diskutohet”, thotë Blerim Krasniqi.

Bajrami: kjo është çështje e brendshme

Idenë për një marrëveshje me Serbinë sa i përket funksionalizmit të gjykatave në veri të Kosovës, njëri nga hartuesit e Kushtetutës së Kosovës Arsim Bajrami, e quan një qasje të gabuar dhe të papranueshme.

“Gjykatat janë pushteti i tretë dhe është një sistem shumë vital për Kosovën. Çfarëdo kompromisi në këtë drejtim me Serbinë do ta vënte në pikpyetje integritetin teritorial dhe integritetin e sistemit kushtetues të Republikës së Kosovës”, thotë Arsim Bajrami.

Gjykatat në veri të Kosovës, pjesë kjo e banuar me shumicë serbe, u ozurpuan me 17 shkurt të vitit 2008 nga serbët lokal, menjëherë pas shpalljes së pavarësisë së Kosovës. Policia e UNMIK-ut, në atë kohë ndërhyri për të larguar serbët nga gjykatat dhe në përleshje me serbët, u vra një polic ndërkombëtar nga Ukraina dhe u plagosën dhjetra të tjerë. Me ardhjen e misionit EULEX në Kosovë në dhjetor të vitit 2008, në gjykatat në veri u vendosen disa gjyqtar dhe prokurorë ndërkombëtar. Mirëpo jo edhe punonjësit shqiptar dhe serb të cilët tash e tri vjetë nuk lejohen të shkojnë në vendet e tyre të punës për shkak se atyre, siç thuhet, nuk mund t'u garantohet siguria në punë.