JUGENE - Superkompjuteri civil me kapacitetin më të madh në botë

Superkompjuteri JUGENE nuk mund të futet poshtë një tavoline shkrimi. Fundja ai ka më shumë se 65.000 procesorë dhe këta duhen sistemuar njëherë. Në rastin e JUGENE-it ata zënë vend në 16 dollapë të zinj. Secili ka afërsisht përmasat e një kabine telefonike. JUGENE-i dhe dy superkompjuterat e tjerë JUMP dhe JUBL gjenden në një palestër të madhe në Jylih (Jülich). Në mënyrë që JUGENE-i të punojë me sukses atij i duhet një temperaturë bazë prej 16 gradësh. Superkompjuteri llogarit aq shpejt sa 20.000 kompjutera personalë njëkohësisht. Ja që një pjesë ose një tjetër mund të nxehet shumë. Kapaciteti maksimal arrin një shpejtësi llogaritjeje 223 Teraflop, pra 223 bilionë llogaritje në sekondë. Një numër thuajse i papërfytyrueshëm. Dr. Norbert Attig, drejtor i sektorit të përdorimit jep këtë shpjegim: 'Në qoftë se e përkthen, atëherë do të ishte sikur në një popullsi shtatë miliardëshe e Tokës secili të kryente në të njëjtën sekondë 30.000 operacione – Dhe operacione nuk do të thotë të numërosh thjesht 1+1, por janë llogaritje më të ndërlikuara? - Po, do të ishte për shembull π x π ose π x 3, 274 ose një paraqitje e përafërt e një numri real, këto më bien në mend.' Kapacitetin llogaritës të JUGENE-it mund ta shfrytëzojnë 200 grupe kërkimore gjermane dhe evropiane. Një komision i pavarur ekspertësh vendos se cilat projekte përfitojnë. Prej kohësh simulimet kompjuterike formojnë pranë teorisë dhe eksperimenteve shtyllën e tretë të shkencës.