Erdogan kërkon anëtarësimin e Turqisë në BE
31 Tetor 2012Kryeministri turk Recep Tayyip Erdogan vazhdon t'i përmbahet qëllimit për anëtarësimin e Turqisë në BE. "Ne pergatitemi për t'u bërë anëtar i plote i BE-së", tha ai në një fjalim në Berlin. Erdogan pranoi se konflikti për ishullin e Qipros të ndarë mes turqve dhe grekëve përbën problem. Turqia nuk e pranon Qipron si anëtar të BE-së. I ftuari nga Ankaraja hapi ambasadën e re të vendit të tij në Berlin.
Sot Erdogan pritet nga kancelarja Angela Merkel. Në qendër të takimit në zyrën e kancelares është lufta civile në Siri. Turqia, fqinje e Sirisë, ka pranuar deri tani më shumë se 100.000 refugjatë sirianë.
BE skeptik ndaj pranimit te Turqisë
Megjithë rritjen e rëndësisë së Turqisë për Gjermaninë dhe Bashkimin Evropian, kryetarët e qeverive të shteteve evropiane nuk janë të bindur ende për anëtarësimin e plotë të Turqisë në BE. Kancelarja gjermane Angela Merkel dhe partia e saj, CDU, janë ndër kundërshtarët më të vendosur të pranimit të Turqisë në BE dhe në vend të kësaj i ofrojnë Turqisë një "partneritet të privilegjuar".
Përveç Gjermanisë edhe shtete të tjera të BE e kundërshtojnë anëtarësimin e plotë të Turqisë, sepse ky vend nuk e ka zgjidhur konfliktin e vjetër prej dekadash me Qipron. Të dyja e kanë bllokuar procesin e pranimit në BE - dhe nga kjo kanë rënë përpjekjet për demokratizimin e vendit.
Gjermania partneri më i madh tregtar i Turqisë
Gjermania është ndërkohë partneri më i madh tregtar i Turqisë. Tregtia dypalëshe arriti një rekord të lartë në vitin 2011 prej 31,4 miliardë eurosh, megjithë krizën ekonomike në Evropë. Përveç kësaj nga Gjermania vjen shumica e investimeve të huaja në Turqi. Ndërkohë atje ka më shumë se 4800 firma me kapital gjerman. Gjermania është burimi kryesor i të ardhurave të industrisë turke të turizmit: 4.8 milionë gjermanë bëjnë çdo vit pushime në Turqi.
Bumi ekonomik prej disa dekadash e renditi Turqinë në vendin e 15-të të ekonomive më të mëdha në botë dhe ka ndryshuar edhe bashkëpunimin e saj ekonomik me Gjermaninë: Këtë vit Gjermania u dha fund 50 vjetëve të ndihmës për zhvillim për këtë vend. Ministria përkatëse gjermane njoftoi në shtator, se e vështron tani Turqinë si "partner ekonomikë të barabartë".