Autoritetet serbe mund ta vizitojnë Kosovën

Një vit prej fillimit të dialogut mes Kosovës dhe Serbisë dhe pas 17 raundeve të bisedimeve në Bruksel, kryeministrat Hashim Thaçi dhe Ivica Daçiq thonë se e besojnë mundësinë e normalizimit të plotë të raporteve mes këtyre dy vendeve. Pas takimit të zhvilluar mbrëmë (07.10.) në Bruksel, me ndërmjetësimin e shefes së diplomacisë evropiane, Chaterine Ashton, kryeministrat e Serbisë dhe Kosovës thanë se ky ishte takimi më i suskesshëm deri më tani. Hashim Thaçi dhe Ivica Daçiq u shprehën se janë zgjidhur të gjitha problemet kontestuese për organizimin e zgjedhjeve lokale në Kosovë - të paktën në tryezën e bisedimeve.

„Kemi rënë dakord që t'i zgjidhim të gjitha problemet më të rëndësishme: që sa më shumë serbë të shënohen në listat zgjedhore, që sa më shumë serbë të zhvendosur të mund të votojnë në zgjedhjet lokale dhe që serbët të kenë përfaqësuesit e tyre në vendvotime. Por kemi rënë dakord edhe për mundësinë që përfaqësuesit e Serbisë të vizitojnë Kosovën gjatë fushatës elektorale apo në ndonjë periudhë tjetër. Këto janë parimet kryesore pa të cilat nuk mund të ketë normalizim të raporteve“, u shpreh kryeministri i Serbisë.

Daçiq: vizitat do të realizohen

Edhe kryeministri i Kosovës beson në mundësinë e normalizimit të raporteve mes Serbisë dhe Kosovës. Ditët e fundit kemi pasur ngritje të tensioneve për shkak të mundësisë së vizitës së kryeministrit të Serbisë në Kosovë. Autoritetet serbe e kanë ndaluar hyrjen e tij në Kosovë, por kryeministri Thaçi thotë se ata "angazhohen për lirinë e lëvizjes pa diskriminime ndaj askujt."

„Në bazë të marrëveshjes së 19 prillit dhe marrëveshjeve të mëparshme për lirinë e lëvizjes, ne do të vlerësojmë çdo kërkesë të autoriteteve të Serbisë për të vizituar Kosovën dhe mbi bazën e fakteve do të japim përgjigje. Por diskriminime me siguri nuk do të ketë“, tha ai.

Thaç pohon se duhet të respektohet procedura për vizita, ndërsa kryeministri i Serbisë është i bindur se vizitat e autoriteteve serbe në Kosovë mund të realizohen përmes "mekanizmit për tejkalimin e çështjeve të hapura."

„Unë nuk do të vazhdoja dialogun, po të mos ishte zgjidhur kjo çështje. Mendoj se me këtë i kam thënë të gjitha. Nëse unë si nënshkrues i marrëveshjes së Brukselit nuk mund të vizitoj Kosovën, atëherë kjo është plotësisht e papranueshme.“

Thaçi: lufta e ftohtë ka përfunduar

Bashkimi Evropian tërë kohën po kërkon një përgatitje të denjë të zgjedhjeve, të cilat për herë të parë do të mbahen në tërë territorin e Kosovës, me pjesëmarrjen e të gjitha bashkësive etnike. Për zbatimin e zgjedhjeve të organizuara mirë, Brukseli u ka bërë thirrje të gjithë votuesve për pjesëmarrje në zgjedhje. Beogradi pohon se i ka plotësuar gati të gjitha obligimet e veta, ndërsa Thaçi u shpreh se "lufta e ftohtë ka përfunduar". Kosova dhe Serbia tani kanë hyrë në fazën e bashkëpunimit evropian, pohon Thaçi.