Поради терористичка закана откажан концерт во Ротердам

Во моментот кога полицијата почнала да го затвора просторот каде што требаше да се одржи концертот на групата од Калифорнија, Алах-Лас, пристигнати биле само мал број посетители. Според организаторите на концертот, се очекувале околу илјада посетители. Меѓутоа, музичарите воопшто не излегле на бината.

Откажувањето на концертот следуваше по предупредувањето од страна на шпанските власти за можен терористички напад. Градоначалникот на Ротердам, Ахмед Абуталеб, на прес-конференција изјави дека во близина на местото на одржување на концертот било пронајдено мало транспортно возило со сомнителни шишиња со гас.

Абуталеб наведе дека возилото имало шпански регистерски таблички. Возачот е упасен. Шпанскиот весник „Ел Паис“ извести дека уапсениот е најверојатно Шпанец.

Холандските антитерористички единици информираа дека нема поврзаност со атентаторите од Барселона и Камбрилс. Степенот на предупредување од тероризам не е подигнат, но тој и онака во целата земја е на четвртото од вкупно пет нивоа на предупредување.

По нападите минатата недела, истрагата соопшти дека осомничените атентатори најверојатно планирале повеќе големи напади, при што требало да бидат употребени и шишиња со гас.