Остатоци од авионот пронајдени кај Александрија

Морнарицата пронајде делови од авионот на 290 километри северно од Александрија, соопшти денеска египетската армија. Лоцирани се и лични предмети на патниците во авионот. Бродови на морнарицата во моментов се во потрага по црната кутија од Ербасот А320, кој се урна од засега непознати причини.

Авионот со 66 патници и членови на екипажот, главно од Египет и Франција, исчезна од радарите во раните утрински часови во четвртокот. Египетската влада смета дека напад е поверојатна причина за уривањето на авионот отколку технички дефект. Од француска страна, пак, се демонстрира воздржаност. Министерот за надворешни работи Жан-Марк Еро изјави дека нема „апсолутно никакво укажување“ за причините за уривањето на авионот и дека и натаму се истражува во сите можни правци.

Во меѓувреме, во Каиро пристигнаа експерти за воздушен сообраќај како поддршка на истрагата.