Голема излезност на вонредните парламентарни избори
5 јуни 2011Македонските граѓани во голем број излегоа на седмите по ред парламентарни избори во земјата. Според неофицијалните податоци кои досега ги соопштуваат Државната изборна комисија и штабовите на двете најголеми политички партии во земјата, СДСМ и ВМРО-ДПМНЕ, одзивот на гласачите на национално ниво бил над 64 проценти.
Во однос на изборните циклуси во 2006-та (56 проценти одзив) и 2008-та година (57 проценти одзив), кога исто така се одржаа вонредни парламентарни избори, излезноста годинава е поголема за повеќе од 8 проценти.
По изборни единици, одзивот во Изборната единица 1 бил 66,4 проценти. Во втората изборна единица, излезноста била 62 отсто, во третата- 72,8 отсто, во четвртата- 73,8, во петката-53,1 и во шестата изборна единица била регистрирана најмал одзив од околу 42 отсто од регистрираните избирачи.
Државната изборна комисија се’ уште не одржала прес-конференција, а според информации на дел од македонските медиуми, ДИК се соочува со проблеми со серверот, па оттука и застојот.
Засега ниту политичките партии не излегуваат со подетални податоци за одзивот, ниту за резултатите од изборите. Според партиските штабови и првичните информации од ДИК, досега се пребројани само мал број гласови и тоа во помалите гласачки места, и владејачката ВМРО-ДПМНЕ е во мала предноста пред опозициската СДСМ. Во албанскиот политички блок, неофицијалните информации велат дека ДУИ однела убедлива победа, а симпатизерите на оваа партија веќе ја слават победата во партиското седиште во Мала Речица.
Автор: Борис Георгиевски
Редактор: Александра Трајковска