ہر چھ میں سے ایک بچہ جنگ زدہ علاقوں میں رہ رہا ہے

بچوں کی بہبود سے متعلق بین الاقوامی غیر سرکاری تنظیم سیو دی چلڈرن کی آج جمعرات کو جاری کی جانے والی رپورٹ کے مطابق بچوں کو جنگ میں استعمال کرنے کے حوالے سے دنیا کے دس خطرناک ترین ممالک میں چھ کا تعلق براعظم افریقہ سے ہے۔ اس رپورٹ میں بچوں کے حوالے سے مختلف عوامل کا جائزہ لیا گیا ہے، جن میں درسگاہوں پر حملے، مسلح تنازعات میں کم سن فوجیوں کی بھرتی، جنسی استحصال، قتل اور انسانی امداد تک ناکافی رسائی  شامل ہے۔

اس فہرست میں شام اول نمبر پر ہے، جس کے بعد افغانستان، صومالیہ، یمن، نائجیریا، جنوبی سوڈان، عراق، کانگو، سوڈان اور وسطی افریقی جمہوریہ آتے ہیں۔ رپورٹ کے مطابق دنیا بھر میں 360 ملین بچے یعنی ہر چھ میں سے ایک بچہ متاثرہ علاقوں میں رہتا ہے اور تنازعات ماضی کی نسبت زیادہ طویل عرصے تک جاری رہتے ہیں۔

ایک تہائی افغان بچے تعلیم سے محروم: سیو دی چلڈرن

جنگوں اور غربت کی وجہ سے بچوں کی زندگیاں اجیرن، یونیسیف

انسانی حقوق کی تنظیم ایمنسٹی انٹرنیشنل کی تیرانا حسن نے اس رپورٹ کے بارے میں کہا کہ صرف غصہ اور تشویش کافی نہیں ہے، ’’جرائم میں بچوں کو شامل کرنا کوئی معمولی بات نہیں اور  ہم توقع کرتے ہیں کہ ان جرائم کے خلاف بھی اسی فعال انداز سے کوششیں کی جائیں، جس طرح کے اقدامات جنگی جرائم کو روکنے کے لیے کیے جاتے ہیں۔‘‘

سیو دی چلڈرن کی یہ رپورٹ ایک ایسے وقت پر سامنے آئی ہے، جب ابھی اسی ہفتے جرمن شہر میونخ میں سلامتی کے موضوع پر ایک سالانہ اجلاس منقعد ہونے والا ہے۔ اس اجلاس کے دوران عالمی رہنما عالمی سلامتی کے حوالے سے پالیسی سازی پر تبادلہ خیال کرتے ہیں۔