کَن فلم فیسٹول کی جیوری: سربراہ کیٹ بلانچیٹ ہوں گی
3 مئی 2018
بیس برس قبل آسٹریلین اداکارہ کیٹ بلانچیٹ عالمی فلمی منظر پر اُس وقت نمودار ہوئیں جب انہوں نے بھارتی ہدایت کار شیکھر کپور کی تاریخی فلم ’ایلزبتھ اول‘ میں ٹائٹل کردار ادا کیا تھا۔ عالمی فلمی صنعت میں اس فلم کو بہت زیادہ پذیرائی حاصل ہوئی تھی۔
وینس فلمی میلہ اختتام پذیر، میکسیکن ہدایتکار کی فلم بہترین
ایک مہاجر کی کہانی، کن فلم فیسٹیول میں
سال کی بہترین فلموں کی دوبارہ نمائش کا امریکی فیسٹول
کَن فلم فیسٹول کا آغاز سولہ مئی سے
فلم ’ایلزبتھ اول‘ میں کردار نگاری پر انہیں پہلے آسکر ایوارڈ سے نوازا گیا تھا۔ اُن کو دوسرے آسکر ایوارڈ کا حقدار سن 2014 میں ہدایتکار وُڈی ایلن کی فلم ’ بلُو جیسمین‘ میں دیا گیا۔ اپنے طویل فلمی و تھیئٹر کیریئر میں انہیں کئی نامی گرامی ہدایتکاروں کے ساتھ کام کرنے کا بھی موقع ملا۔
کیٹ بلانچیٹ آسٹریلوی شہر میلبورن سے تعلق رکھتی ہیں۔ اڑتالیس سالہ آسٹریلوی اداکارہ آسکر ایوارڈ کے علاوہ کئی اور ایوارڈز بھی جیت چکی ہیں۔ اُن کے شاندار فلمی کیریئر میں ایک نیا اعزاز انہیں بین الاقوامی شہرت کے حامل فرانس میں منعقد ہونے والے کَن فلمی میلے کی جیوری کی سربراہی کا حاصل ہوا ہے۔ وہ اس فلمی میلے کی جیوری کی سربراہی سنبھالنے والی بارہویں خاتون ہوں گی۔
کن فلمی میلے کی جیوری کی سربراہ بنائے جانے پر بلانچیٹ نے ردعمل ظاہر کرتے ہوئے کہا کہ وہ کئی مرتبہ مختلف حیثیتوں میں کَن جا چکی ہیں لیکن اس مرتبہ حیثیت منفرد ہے۔ ان کا کہنا ہے کہ وہ کن فیسٹول میں بطور اداکارہ، پروڈیوسر، مارکیٹ کے نمائندے اور ریڈ کارپٹ میں شرکت کے ساتھ مقابلوں میں بھی شریک رہی ہیں۔
کَن فلم فیسٹول کی انتظامی کمیٹی کے سربراہ تھیئری فریمو نے بھی اپنے بیان میں کہا کہ رواں برس جیوری کی سربراہی ایک ایسی منفرد اداکارہ کو سونپی گئی ہے، جو انتہائی صلاحیتوں کی مالک ہوتے ہوئے بیک وقت فلم اور تھیئٹر کی دنیا کا معتبر حوالہ ہیں۔ کن فلمی میلے کی جیوری نو ارکان پر مشتمل ہے۔ اس جیوری میں امریکی اداکارہ کرسٹن اسٹیورٹ، تائیوانی ادار چانگ چن، فرانسیسی اداکارہ لے سیدُو اور بلغاریہ کی شاعرہ خدیجہ نِن بھی دوسرے اراکین کے ساتھ شامل ہیں۔
فرانس کے سیاحتی و ساحلی شہر کَن، ہر سال اس بین الاقوامی فلمی میلے کا میزبان ہوتا ہے۔ رواں برس یہ فلمی میلہ آٹھ مئی سے لے کر انیس مئی تک جاری رہے گا۔ مرکزی مقابلے میں اکیس فلمیں شریک ہیں۔
ع ح ⁄ الف الف ⁄ ڈی پی اے