چین صدر متحدہ عرب امارات کے دورے پر

چین کے صدر شی جن پنگ نے خلیجی ریاست متحدہ عرب امارات کا تین روز دورہ ہفتہ اکیس جولائی کو مکمل کر لیا ہے۔ وہ جمعرات کو خلیجی ریاست پہنچے تھے۔ اس دورے کے اختتام پر متحدہ عرب مارات نے کہا ہے کہ دونوں ملک جامع اسٹریٹیجک پارٹنرشپ قائم کرنے پر متفق ہو گئے ہیں۔

اماراتی نیوز ایجنسی WAM کے مطابق دونوں ملکوں کی قیادت نے تمام شعبہ ہائے زندگی میں تعاون کو فروغ دینے پر اتفاق کیا ہے۔ جمعہ بیس جولائی کو اعلیٰ قیادت کی موجودگی میں دونوں ممالک کے حکام نے کئی اقتصادی و تجارتی سمجھوتوں کو حتمی شکل بھی دی تھی۔ ان سمجھوتوں میں تیل و گیس کی ڈیل بھی شامل تھیں۔

چینی صدر نے اس دورے کے دوران اماراتی لیڈروں سے ملاقاتوں کا سلسلہ بھی جاری رکھا۔ شی جن پنگ نے متحدہ عرب امارات کے نائب صدر شیخ محمد بن راشد المکتوم سے بھی ملاقات کی۔ المکتوم دبئی کے حکمران ہیں۔ چینی صدر سے ابوظہبی کے ولی عہد پرنس محمد بن زید النہیان نے بھی خصوصی ملاقات کی۔ اماراتی نیوز ایجنسی کے مطابق ان ملاقاتوں میں دو طرفہ امور میں خاص طور پر سیاحت و معاشی معاملات پر فوکس کیا گیا۔

اس دورے کے اختتام پر جاری ہونے والے بیان میں واضح کیا گیا کہ دونوں ممالک سیاست، اقتصادیات، تیل و گیس اور سلامتی کے امور میں وسیع تعاون کو فروغ دیں گے۔

اس دورے کے دوران متحدہ عرب امارات نے چین کے ساتھ مشترکہ فوجی تربیت پر بھی اتفاق کیا گیا۔ امارتی لیڈر شپ نے چینی صدر کے اس بیانیے ’ ون بیلٹ، ون روڈ‘ میں گہری دلچسپی ظاہر کی ہے۔ چین صدر کے قدیمی سلک روڈ کے احیاء کا بین الاقوامی پراجیکٹ ٹریلین ڈالر پر مشتمل ہے۔

چینی صدر شی جنگ پینگ خلیجی ریاست متحدہ عرب امارات کا دورہ مکمل کرنے کے بعد چار افریقی ملکوں کا دورہ بھی کریں گے۔ ان میں سینیگال، روانڈا، جنوبی افریقہ اور ماریشس شامل ہیں۔