چين کا زور توڑنے کے ليے امير ملک غريب ممالک کی مدد کريں گے

ترقی يافتہ ریاستوں کے گروپ جی سيون کے رکن ممالک نے غريب ملکوں ميں بنيادی ڈھانچے ميں بہتری کے ليے ايک وسيع تر منصوبے کو حتمی شکل دے دی ہے۔ امير ممالک غريب ریاستوں کے انفراسٹرکچر کی بہتری کے ليے سرمايہ کاری کريں گے۔ اس کاوش کا مقصد چين کے بڑھتے ہوئے اقتصادی اثر و رسوخ اور بالخصوص 'بيلٹ اينڈ روڈ انيشی ايٹوو‘ کا مقابلہ کرنا ہے۔ امريکا کے 'بہتر دنيا کی تعمير نو‘ (B3W) کی طرز پر تشکيل ديے گئے اس منصوبے کو امريکی صدر جو بائيڈن کی ديگر رہنماؤں کے ساتھ ملاقات کے بعد حتمی شکل دی گئی۔

برطانيہ کے ساحلی علاقے کاربِس بے ميں تين روزہ جی سيون سمٹ جمعے کو شروع ہوئی تھی۔ پہلے دن رکن ممالک نے غريب ملکوں کے ليے کورونا ويکسين عطيہ کرنے کا اعلان کيا۔ اس سمٹ کی اہم بات يہ ہے کہ اس ميں دو برس بعد پہلی مرتبہ رکن ملکوں کے سربراہان بالمشافہ مل رہے ہيں۔ ورنہ کورونا کی وبا کی وجہ سے گزشتہ ڈيڑھ سال سے تقريباﹰ تمام سربراہی اجلاس آن لائن ہی ہوتے رہے ہيں۔ جی سيون گروپ برطانيہ، کينيڈا، فرانس، جرمنی، اٹلی، جاپان اور امريکا پر مشتمل ہے۔

مستقبل ميں کسی نئی عالمی وبا سے نمٹنے کی جامع حکمت عملی

جی سيون سمٹ ميں ہفتہ بارہ جون کو شرکاء کے مابین مستقبل ميں کسی نئی عالمی وبا سے بچنے کے ليے ایک متفقہ اور جامع حکمت عملی پر اتفاق رائے ہو گیا۔ 'کاربِس بے ڈیکليريشن‘ کو حتمی شکل دينے کے بعد ايک مشترکہ اعلاميہ بھی تیار کیا گيا ہے، جس کی تفصيلات کل اتوار کو جاری کی جائيں گی۔

سمٹ ميں زير بحث ديگر موضوعات

جی سيون سربراہی اجلاس کے دوسرے دن کے اہم موضوعات ميں روس کی وجہ سے لاحق چيلنجز بھی شامل ہيں۔ ميانمار ميں فوجی بغاوت، ہانگ کانگ ميں جمہوری اقدار کی بقا کے لیے جدوجہد اور مشرقی يوکرائن ميں مبينہ روسی مداخلت سميت کئی اہم امور پر بھی بات چيت جاری ہے۔ اس تين روزہ اجلاس ميں اس بار خصوصی دعوت پر شرکت کرنے والے ممالک آسٹريليا، جنوبی افريقہ، جنوبی کوريا اور بھارت کے نمائندوں سے بھی ہفتے کے روز تبادلہ خيال کیا جا رہا ہے۔ کل اس اجلاس کا آخری دن ہے، جس دوران ماحولیاتی تبديليوں سے جڑے خطرات اور مسائل پر گفتگو کی جائے گی۔

ع س/ م م (اے ايف پی، روئٹرز)