پٹس برگ میں فائرنگ، متعدد افراد کی ہلاکت کی اطلاع

امریکی ریاست پنسلوینیا کے شہر پٹس برگ کے مقامی ذرائع ابلاغ کی جانب سے اس واقعے میں ہلاک ہونے والوں کی تعداد چار سے سات بتائی جا رہی ہیں جبکہ زخمیوں میں تین پولیس اہلکار بھی شامل ہیں۔

تازہ ترین اطلاعات کے مطابق مشتبہ حملہ آور کو حراست میں لے لیا گیا ہے۔ مقامی ٹی وی چینل ’کے ڈی کے اے‘ نے بتایا ہے کہ گرفتار کیا جانے والا شخص ایک سفید فام ہے۔

امریکی صدر ڈونلڈ ٹرمپ نے اپنی ٹویٹ میں لکھا ہے کہ وہ پٹس برگ واقعے کے حوالے سے تمام تر تفصیلات پر نگاہ رکھے ہوئے ہیں، ’’ایسا لگتا ہے کہ جیسے متعدد ہلاکتیں ہوئی ہیں۔‘‘  پنسلوینیا  کے گورنر ٹوم وولف نے فائرنگ کے اس واقعے کو سانحہ قرار دیا ہے، ’’ہم دعا گو ہیں اور امید کرتے ہیں کہ مزید کوئی جانی نقصان نہ ہو۔‘‘

پولیس کے مطابق فائرنگ کا یہ واقعہ پٹس برگ کے ’ٹری آف لائف‘ نامی سیناگوگ کے قریب پیش آیا۔ اس دوران یہودی عبادت گاہ کے اطراف کی ناکہ بندی کر دی گئی ہے۔ یہ سینا گوگ  ولکنس اور شیڈی ایونیور کے قریب واقع  ہے اور علاقہ شہر پٹس برگ کے مرکز سے دس منٹ کی دوری پر ہے۔ شہر کی یہودی برادری کا ایک بڑا حصہ بھی اسی علاقے میں آباد ہے۔

پولیس نے شہریوں کو گھروں سے باہر نہ نکلنے کی تاکید کی ہے۔ ساتھ ہی یہ ابھی تک واضح نہیں ہے کہ زخمی و ہلاک ہونے والوں کی اصل تعداد کتنی ہے اور فائرنگ کے اس واقعے کا پس منظر کیا ہے۔

ع ا / ع آ (نیوز ایجنسیاں)