پاکستانی پولیس نے غریب مسیحی جوڑے کو مشتعل ہجوم سے بچا لیا

نیوز ایجنسی اے ایف پی نے لاہور سے اپنی ایک رپورٹ میں لکھا ہے کہ یہ واقعہ صوبہٴ پنجاب کے مکّی نامی قصبے میں اس ہفتے منگل کو پیش آیا تھا۔ پولیس کی بر وقت اور کامیاب مداخلت کا یہ ایک غیر معمولی واقعہ ہے، ورنہ عام طور پر اس طرح کے واقعات میں توہینِ مذہب کے غیر ثابت شُدہ الزامات میں بہت سے لوگ مشتعل ہجوم کے ہاتھوں مارے جاتے ہیں۔

ضلعی پولیس چیف سہیل ظفر چٹھہ نے اے ایف پی سے باتیں کرتے ہوئے بتایا کہ اس ناخواندہ مسیحی جوڑے کو کہیں سے اشتہار کے طور پر استعمال ہونے والی پَینافلیکس شِیٹ ملی تھی، جسے یہ اپنے گھر میں سونے کے لیے گدے کے طور پر بچھاتے تھے۔ اس شِیٹ پر مختلف کالجوں کے نام اور مختلف نعرے لکھے ہوئے تھے۔

کالجوں کے ان اشتہارات میں عربی زبان میں ایسی تحریریں بھی تھیں، جو مبینہ طور پر قرآنی آیات پر مشتمل تھیں۔ یہ پتہ چلنے کے بعد ایک مقامی حجام کے ساتھ ساتھ دو مولویوں نے بھی اس مسیحی جوڑے پر مذہبِ اسلام کی توہین کا الزام عائد کر دیا۔

ضلعی پولیس چیف سہیل ظفر چٹھہ نے اپنی فیس بُک پر لکھا:’’اس قصبے کے باشندے وہاں جمع ہو گئے اور اُنہوں نے اس غریب جوڑے کو گھسیٹ کر گھر سے باہر نکالا، جسے یہ بھی پتہ نہیں تھا کہ اُس کا جرم کیا ہے۔ لوگ اُنہیں جان سے مار دینا چاہتے تھے۔ پولیس نے بر وقت مداخلت کی اور اس مسیحی جوڑے کو مشتعل ہجوم کے ہاتھوں سے بچا کر لاہور منتقل کر دیا، جہاں دونوں میاں بیوی کو مسیحی کمیونٹی کے بزرگوں کے حوالے کر دیا گیا۔‘‘

پولیس نےمولویوں میں سے ایک کو گرفتار کر لیا ہے جبکہ دوسرے مولوی کے ساتھ ساتھ حجام بھی مفرور ہے۔ پولیس نے کچھ مقامی افراد سے پوچھ گچھ کی تو پتہ چلا کہ الزام لگانے والا حجام غالباً اس مسیحی جوڑے کا گھر حاصل کرنے میں دلچسپی رکھتا تھا۔

حقوقِ انسانی کے لیے سرگرم تنظیموں کا کہنا ہے کہ پاکستان میں توہینِ مذہب کے قوانین بہت سخت ہیں اور اکثر لوگ اپنے ذاتی تنازعات کو نمٹانے کے لیے اقلتیوں اور غریبوں کے خلاف ان قوانین کا سہارا لیتے ہیں۔

حقوقِ انسانی کے ایک مسیحی وکیل ندیم اینتھنی نے پولیس کی کارروائی کو سراہا ہے:’’یہ ایک مثبت پیشرفت ہے کہ پولیس اپنی ذمے داریوں کو سنجیدگی سے لے رہی ہے اور اس طرح کے معاملات میں متاثرین کو تحفظ فراہم کر رہی ہے۔‘‘ ندیم اینتھنی نے کہا کہ اُسے تین اور کیسز کا بھی علم ہے، جہاں حکام نے بر وقت مداخلت کی:’’اگر ریاست اور اُس کے ادارے اسی طرح اپنی ذمے داریاں انجام دیتے رہیں تو اُن عناصر کی حوصلہ شکنی ہو گی، جو قانون کو اپنے ہاتھوں میں لیتے ہیں۔‘‘

واضح رہے کہ پاکستان کی بیس کروڑ کی آبادی میں مسیحیوں کا تناسب محض تقریباً دو فیصد ہے اور وہ حالیہ برسوں کے دوران مشتعل افراد کے ساتھ ساتھ عسکریت پسندوں کے بھی حملوں کا نشانہ بنتے رہے ہیں۔

گزشتہ سال ایک بھٹے پر مزدوری کرنے والے شہزاد مسیح اور اُس کی حاملہ بیوی شمع بی بی کو پندرہ سو سے زائد افراد پر مشتمل ایک مشتعل ہجوم نے بری طرح سے مارنے پیٹنے کے بعد ایک جلتی ہوئی بھٹی میں پھینک دیا تھا۔ اس واقعے سے پہلے یہ افواہیں گردش کرنے لگی تھیں کہ اس مسیحی جوڑے نے قرآن کے صفحات کو کوڑے میں پھینک دیا تھا۔