پاکستان: خیبر میں گیارہ سیکیورٹی اہلکار اغواء

افغانستان سے ملحق پاکستان کے قبائلی علاقے خیبر میں نامعلوم مسلح افراد نے ایک چیک پوسٹ پر حملہ کرکے وہاں تعینات گیارہ خاصہ داروں کو اغواء کرکے نامعلوم جگہ پر منتقل کردیا ہے۔ اغوا ہونے والوں میں خاصہ دار فورس کا ایک صوبے دار بھی شامل ہے۔

اطلاعات کے مطابق خیبر ایجنسی کی پولیٹکل انتظامیہ نے خاصہ داروں کی تلاش شروع کردی ہے اور اس کے لیے مقامی جرگے سے رابطہ کیا گیا ہے تاہم اب تک سیکیورٹی اہلکاروں کے بارے میں کوئی اطلاع نہیں ملی ہے۔ واقعے کی زمہ داری تاحال کسی گروہ یا تنظیم نے قبول نہیں کی ہے۔

واضح رہے کہ افغانستان سے ملحق پاکستان کے شمالی مغربی سرحدی علاقوں میں طالبان عسکریت پسندوں اور حکومت کے درمیان لڑائی کافی عرصے سے جاری ہے۔ حال ہی میں نئی جامع افغان پالیسی کا اعلان کرتے ہوئے امریکی صدر باراک اوباما نے ان علاقوں کو ’دنیا کا خطرناک ترین سرحدی علاقہ‘ قرار دیا۔ یہاں بعض علاقوں میں عملی طور پر طالبان عسکریت پسندوں کی عمل داری نافذ ہے۔

یاد رہے کہ ابھی چند روز قبل خیبر ایجنسی می تحصیل جمرود میں ایک خود کش حملے کے نتیجے میں ستر کے قریب افراد ہلاک ہوئے تھے اور ڈیڑھ سو سے زائد زخمی ہوئے تھے۔

ایک اور واقعے میں برقمبر نامی قبائلی علاقے میں شدّت پسند اسلامی تنظیم امربالمعروف کے چھ عہدیداروں کو بھی اغوا کرلیا گیا ہے۔ اس واقعے کو مختلف اسلامی عسکریت پسندوں کا اندرونی تنازعہ قرار دیا جا رہا ہے۔