ٹریزا مے ’’میرا کام جاری رہے گا‘‘

اپنے خلاف پیش کی گئی تحریک عدم اعتماد کی ناکامی کے صرف تین گھنٹے بعد ہی برطانوی وزیر اعظم ٹریزا مے نے اپنی سرکاری رہائش گاہ ٹین ڈاؤننگ اسٹریٹ سے ایک وضاحت جاری کی۔ ان حالات میں مے کی بے چینی اور گھبراہٹ محسوس کی جا سکتی ہے۔

مے کے بقول، ’’میرے خیال میں یہ میری ذمہ داری ہے کہ میں برطانوی عوام کے یورپی یونین سے انخلاء کے فیصلے کا احترام کروں اور اس کے لیے میں تمام تر اقدامات اٹھانے کا ارادہ رکھتی ہوں‘‘۔

یہاں پر ان کی مراد یہ تھی کہ وہ بریگزٹ کو ممکن بنانے کی کوششیں جاری رکھیں گی۔ لندن میں مے نے مزید کہا کہ گزشتہ چوبیس گھنٹوں کے دوران پیش آنے والے واقعات عوام کے لیے بے چینی کا باعث بنے ہیں۔

اس موقع پر  برطانوی وزیراعظم  نے پارلیمان سے متحد رہنے کی درخواست بھی کی۔ ان کے بقول ارکان نے رائے شماری میں اپنی مرضی اور اپنی خواہشات واضح کر دی ہیں، ’’ہمیں لازمی طور پر  مثبت انداز میں مل جل کر پارلیمان کے فیصلے کے مطابق کام جاری رکھنا ہو گا۔‘‘

اس دوران مے نے حزب اختلاف کے سیاستدانوں سے رابطے شروع کر دیے ہیں۔ بریگزٹ معاہدے پر رائے شماری میں ناکامی کے بعد حزب اختلاف کے رہنما جیرمی کوربن نے ٹریزا مے کےخلاف تحریک عدم اعتماد پیش کی تھی۔

 اس تحریک کے حق میں تین سو چھ ووٹ پڑے، یوں مے صرف انیس ووٹوں سے اپنی حکومت بچانے میں کامیاب ہوئیں۔ مے کو  اب اکیس جنوری تک پارلیمان میں نیا بریگزٹ منصوبہ پیش کرنا ہو گا۔