ٹرمپ کی صدارت کی بیخ کنی کے لیے امریکی حکام کی ’جانفشانی‘

اخبار نیویارک ٹائمز میں یہ اداریہ لکھنے والے کا نام ظاہر کیے بغیر شائع کیا گیا ہے۔ وائٹ ہاؤس کے ایک سینیئر اہلکار نے اس اداریے میں لکھا ہے کہ انتظامیہ کے اہم حکام صدر ڈونلڈ ٹرمپ کی صدارت کے بعض حصوں کو کمزور بنانے میں لگے ہوئے ہیں۔

اس سینیئر اہلکار کے مطابق جس کا نام ظاہر نہیں کیا گیا،’’ صدر ٹرمپ کو اپنے ہم عصر امریکی رہنماؤں کے برعکس آزمائش کا سامنا ہے۔ میں بھی ٹرمپ انتظامیہ کے اندر رہتے ہوئے صدر کے خلاف جاری مزاحمت کا ایک حصہ ہوں۔‘‘

اس  اہلکار کا مزید کہنا تھا کہ مشکل یہ بھی ہے کہ ٹرمپ اس بات سے واقف نہیں کہ خود وائٹ ہاؤس کے اندر ایسے لوگ موجود ہیں جو صدر کی غلط پالیسیوں اور اُن کے جھکاؤ کے رحجانات کے سبب اُن سے ناراض ہیں اور ان کے خلاف کام میں مصروف ہیں۔

اخبار نے اس آرٹیکل کے ساتھ یہ نوٹ بھی لکھا ہے کہ کسی گمنام اہلکار کا اس نوعیت کا آرٹیکل شائع کرنا ڈیسک کا ایک غیر معمولی اقدام ہے۔ تاہم ڈیسک کی رائے میں اخبار کے ایڈیٹرز کا موقف ہے کہ صرف اسی طرح وہ اپنے قارئین کو ایک بہت اہم نقطہ نظر فراہم کر سکتے تھے۔

گمنام مصنف نے اس آرٹیکل میں لکھا ہے کہ وائٹ ہاؤس میں ’دو طرفہ طرز کی پریزیڈنسی‘ چل رہی ہے جس میں سینیئر اہلکار وہ کرنے کی کوشش کرتے ہیں جو صحیح تصور کرتے ہیں خواہ ٹرمپ اس کے مخالف ہی کیوں نہ ہوں۔ اس اہلکار نے اس تناظر میں ٹرمپ کی جانب سے روسی صدر ولادی میر پوٹن اور شمالی کوریائی سربراہ کم جونگ اُن جیسے آمر اور مطلق العنان حکمرانوں کو امریکی اتحادیوں پر ترجیح دینے کی مثال بھی پیش کی۔

در حقیقت صدر ٹرمپ کا رویہ جرمنی سمیت نیٹو میں شامل امریکی اتحادی ممالک کے حوالے سے سخت ناقدانہ رہا ہے۔ اس ایڈیٹوریل کے شائع ہوتے ہی صدر ٹرمپ اس کے مصنف پر سخت برہم ہوئے اور نیو یارک ٹائمز اخبار کو بد دیانت بھی کہا۔

ٹرمپ نے اس آرٹیکل پر شدید رد عمل کا اظہار کرتے ہوئے کہا،’’ وہ ٹرمپ کو پسند نہیں کرتے اور میں انہیں پسند نہیں کرتا۔ تو اگر اپنی ساکھ کھوتا ہوا نیویارک ٹائمز یہ سمجھتا ہے کہ کسی گمنام شخص کی طرف سے لکھا گیا ایک آرٹیکل شائع  کرے تو کیا ہم اس پر یقین کر لیں گے؟ یہ ایک بزدلانہ فعل ہے۔ ہم بہت اچھا کام کر رہے ہیں۔‘‘

وائٹ ہاؤس کی پریس سیکریٹری سارہ سیندرز نے اس آرٹیکل کو بے بنیاد اور افسوسناک قرار دیتے ہوئے اس کے مصنف سے استعفے کا مطالبہ کیا ہے۔

ص ح / ع ا / نیوز ایجنسی